Norska liðið er stútfullt af gæðaleikmönnum sem spila með bestu liðum Evrópu og hafa töluverða reynslu af stórmótum á meðan Norður-Írland var að spila sinn fyrsta leik á stórmóti.
Markaskorarar Noregs í leiknum spila með Manchester City, Arsenal, Chelsea og Barcelona á meðan þrír leikmenn N-Írlands hafa á einhverjum tímapunkti spilað á Íslandi.
Noregur og Norður-Írland mættust í leik dagsins á EM í fótbolta. Nóg af mörkum skoruð í 4-1 sigri Norðmanna sem byrja mótið af krafti
— RÚV Íþróttir (@ruvithrottir) July 7, 2022
Mörkin má sjá hér: pic.twitter.com/LzjL04FdC8
Leikurinn var aðeins tíu mínútna gamall þegar Julie Blakstad kom Noregi yfir með hnitmiðuðu skoti niðri í hornið nær. Aðeins þremur mínútum síðar var staðan orðin 2-0, Frida Leonhardsen Maanum með markið.
Það var svo sléttur hálftími liðinn þegar Noregur fékk vítaspyrnu, Caroline Graham Hansen þrumaði boltanum af öryggi í netið og staðan orðin 3-0. Fleiri mörk urðu ekki skoruð í fyrri hálfleik og sigur Noregs svo gott sem kominn í hús.
Julie Nelson minnkaði muninn fyrir N-Írland snemma í síðari hálfleik en Guro Reiten sá til þess að endurkoman var ekki langlíf. Staðan 4-1 þegar enn voru 35 mínútur til leiksloka en mörkin urðu ekki fleiri og Noregur byrjar EM af krafti. Á sama tíma er ljóst að N-Írland á erfitt verkefni fyrir höndum.
