Umfjöllun,viðtöl og myndir: Haukar – Þór Þor­l. 93-95 | Þórsarar í undan­úr­slit eftir ævintýralegan sigur

Þór Þorlákshöfn er komið í undanúrslit Subway-deildar karla í körfubolta eftir ævintýralegan sigur í oddaleik í Ólafssal. 

Haukar tóku frumkvæðið og byrjuðu betur. Darwin Davis og Norbertas Giga hafa báðir verið að glíma við meiðsli en voru báðir í byrjunarliðinu og það var við hæfi að þeir gerðu fyrstu tvær körfunnar.

Það mátti skynja stress í spilamennsku Þórs Þorlákshafnar til að byrja með. Gestirnir tóku átta þriggja stiga skot og hittu aðeins úr einu í fyrsta leikhluta. Þór tapaði einnig fimm boltum. Haukar voru afar óskynsamir undir lok fyrsta leikhluta þar sem þeir voru að brjóta klaufalega á Þórsurum sem gerðu síðustu sex stigin öll úr vítum.

Eftir að hafa byrjað 1 af 9 í þriggja stiga skotum brast stíflan í öðrum leikhluta. Tómas Valur Þrastarson setti niður þrist og Vincent Shahid fylgdi því eftir með tveimur þriggja stiga körfum í röð.

Það var mikill munur á framlagi sem liðin fengu af varamannabekknum. Byrjunarlið Hauka gerði öll stig heimamanna í fyrri hálfleik á meðan varamannabekkur Þórs Þorlákshafnar skilaði 15 stigum.

Þór Þorlákshöfn endaði á að gera síðustu fimm stig fyrri hálfleiks. Heimamenn voru þremur stigum yfir í hálfleik 44-41.

Þórsarar sýndu sitt rétta andlit í þriðja leikhluta og spiluðu töluvert betur. Gestirnir náðu að fá stemninguna með sér og komust yfir í fyrsta skipti um miðjan þriðja leikhluta.

Jordan Semple endaði þriðja leikhluta á frábærum varnarleik þar sem hann lokaði á Hilmar Smára og varði síðan skotið hans. Semple öskraði síðan í grillið á Hilmari og fékk afar klaufalega tæknivillu. Haukar voru einu stigi yfir þegar haldið var í fjórða leikhluta 72-71.

Vincent Malik Shahid setti Þór Þorlákshöfn á bakið í fjórða leikhluta og sá til þess að Þórsarar færu í undanúrslitin. Shahid var ótrúlegur undir lokin þar sem hann hitti nánast úr öllu. Shahid gerði 12 af síðustu 15 stigum Þórs Þorlákshafnar. Gestirnir unnu að lokum tveggja stiga sigur 93-95. 

Af hverju vann Þór Þorlákshöfn?

Það var ekki mikill afgangur af þessum sigri. Þórsarar voru slakir í fyrri hálfleik en Haukar voru klaufar og gáfu þeim ódýrar körfur úr vítum sem hélt þeim inni í leiknum.

Undir lok fjórða leikhluta gerði Shahid átta stig á tæplega mínútu sem kláraði leikinn. 

Hverjir stóðu upp úr?

Vincent Malik Shahid breyttist í ofurhetju í kvöld. Shahid var magnaður og endaði með 35 stig og 8 stoðsendingar. 

Pablo Hernandez Montenegro hefur oft fengið mikla gagnrýni en hann spilaði vel í kvöld og kom með mikilvægar körfur í þriðja leikhluta. Pablo endaði með 15 stig og tók 6 fráköst.

Hvað gekk illa?

Haukar gátu nagað sig í handarbökin á að hafa ekki verið meira en þremur stigum yfir í hálfleik. Gestirnir enduðu fyrsta leikhluta á að gera sex stig í röð úr vítum. Sama var upp á tengingum í öðrum leikhluta þar sem síðustu tvö stig Þórs komu eftir klaufalega villu Hauka. 

Hvað gerist næst?

Valur og Þór Þorlákshöfn mætast á föstudaginn í Origo-höllinni klukkan 19:15. Tímabilinu er lokið hjá Haukum sem eru komnir í sumarfrí.

Máté: Rulluspilarar breyttust í stjörnur

Máté Dalmay, þjálfari Hauka, var afar svekktur eftir tap í oddaleik gegn Þór Þorlákshöfn.

„Mér fannst við vera með þetta þangað til fjórði leikhluti var hálfnaður. Okkur tókst ekki að koma forskotinu í tveggja stafa tölu. Þeir settu stór skot niður í fjórða leikhluta og við vissum að það myndi skipta máli.“

Haukar spiluðu afar vel í fyrri hálfleik en Haukar voru að brjóta klaufalega af sér sem varð til þess að Þór hélt sér inn í leiknum á vítaskotum.

„Við vorum með þetta í góðu jafnvægi þar sem vörnin virkaði vel og við fengum góðar opnanir sóknarlega. Við vorum svakalegir klaufar þar sem við vorum að senda þá trekk í trekk á vítalínuna.“

Haukar komu sem nýliðar í Subway-deildina og Máté var nokkuð sáttur með tímabilið í heild sinni.

„Við duttum út í oddaleik með tveimur stigum. Við tókum eitt skref og munum byggja ofan á þetta tímabil. Við munum setja saman sterkt lið sem mun komast einu jafnvel tveimur skrefum lengra.“

„Við erum að fara gera spennandi hluti á næsta ári og stækka starfið mitt. Við munum byggja ofan á þessu tímabili. Við ætlum að fá fleiri efnilega íslenska leikmenn sem fá að sjá gólfið hérna og fá hlutverk til að þroskast. Það sáu það allir í vetur að rulluspilarar urðu að stjörnum og fyrstu deildarleikmenn urðu að úrvalsdeildarleikmönnum og við munum halda áfram að gera það,“ sagði Máté Dalmay að lokum.