Leik lokið: Dan­mörk - Norður Ír­land 1-0 | Danir á toppinn í H-riðli

Eftir óvænt tap í Kasakstan mátti Danmörk ekki við því að tapa stigum á heimavelli í undankeppni EM 2024 í knattspyrnu. N-Írar mættu til Kaupmannahafnar í von um að lyfta sér upp fyrir Dani í H-riðli en varð ekki kápan úr því klæðinu.

Danir mörðu sigur í leiknum 1-0 með marki frá Jonas Wind í upphafi seinni hálfleiks. Með sigrinum löguðu Danir stöðu sína í riðlinum töluvert til og eru efstir sem sakir standa með sex stig eftir þrjá leiki. Það er þó áfram allt í járnum því Kasakstan, Finnland og Slóvenía eru einnig öll með sex stig.