Jóhann Berg kom inn af bekknum í stór­sigri Burnl­ey

Burnley vann Sheffield United örugglega í nýliðaslag liðanna í ensku úrvalsdeildinni. Gestirnir frá Sheffield voru manni færri allan síðari hálfleik og það nýttu lærisveinar Vincents Kompany sér.

Landsliðsfyrirliðinn Jóhann Berg Guðmundsson hóf leik á bekknum í dag en kom inn á 65. mínútu. Þá voru Burnley tveimur mörkum yfir og manni fleiri. Jay Rodriguez og Jacob Bruun Larsen með mörkin á meðan Oliver McBurnie nældi sér í tvö gul og þar með rautt í liði Sheffield.

Á sjö mínútna kafla undir lok leiks skoraði Burnley þrjú til viðbótar og gekk algjörlega frá leiknum. Zeki Amdouni skoraði þriðja markið, Luca Koleosho það fjórða og Josh Brownhill það fimmta, lokatölur 5-0.

Burnley fer með sigrinum upp í 18. sæti með 7 stig, tveimur stigum frá öruggu sæti. Sheffield United er sæti neðar með 5 stig.