Var um að ræða tvenna viðburði yfir daginn, annars vegar fatamarkað með fatamerkjum sem sérhæfa sig í svokölluðum götustíl (e. streetwear) og svo tónlistarhátíð þar sem nokkrir af stærstu hip hop listamönnum landsins komu fram.
„Fatamarkaðurinn samanstóð af þekktustu íslensku „streetwear“ fatamerkjunum sem eru Reykjavik Roses, Metta Sport, Child x Coppermine og nýju fatamerki DDX.
Á tónlistarhátíðinni tróðu Birnir, Clubdub, Joey Christ og DJ Daði Ómars upp ásamt sérstökum gestum sem voru rappararnir Big Joe og Krabbamane,“ segir í fréttatilkynningu.
Rvk X var skipulagt af Daniel Darra Björgólfssyni, Rakel Maríu Gísladóttur og Heklu Gaju Birgisdóttur en blaðamaður ræddi við þá síðarnefndu.
„Ég sá aðallega um markaðssetninguna á viðburðinum ásamt frábæru teymi hjá Flysouth sem og Sigurði Ými sem er einn eiganda Child. Rvk X lógóið okkar var síðan hannað af Ísaki Einarssyni og Þorgeiri K. Blöndal,“ segir Hekla Gaja og bætir við:
„Markmið okkar með viðburðinum var að endurvekja áhuga og spennu hjá ungu fólki fyrir íslenskri hönnun og listamönnum.
Við héldum þetta því á Menningarnótt í Bílakjallara Grósku.“
Fatamarkaðurinn var milli 15:30-18:00 en á það mættu um 300 manns, sem var að sögn Heklu Gaju aðallega ungt fólk á aldrinum 15-25 ára.
„Það var mikil spenna og tilhlökkun fyrir þessu en fyrstu gestir voru mættir rétt fyrir tíu að bíða eftir opnun og salan gekk mjög vel. Reykjavik Roses seldi til dæmis upp allar sínar vörur á innan við hálftíma.“
Yfir daginn komu nokkrir plötusnúðar fram og sáu um að halda uppi stemningunni. Það voru DJ Payday+BF, DJ RM og DJ Valgeir.
„Það var síðan uppselt á tónlistarhátíðina okkar en hún var á milli 23:00-2:30 og mættu um 800 manns í bílakjallarann. Það var tuttugu ára aldurstakmark þar og gestir voru á öllum aldri yfir tvítugt.“
Hér má sjá myndir frá viðburðinum:
