Reyna að eyða minningum um hvort annað í sturluðum dansi

Myndin ber heitið 1000 orð og er lifandi túlkun á samnefndri plötu sem tvíeykið gaf nýlega út. 

Hér má sjá myndina 1000 orð:

Par sem reynir að eyða minningum um hvort annað

„Birnir og Bríet höfðu samband við mig mjög snemma í ferlinu með það í huga að gera stuttmynd samhliða plötunni 1000 orð. 

Við hittumst einn góðan veðurdag á kaffihúsi og fundum fljótt ákveðinn grunn í að segja sögu pars sem væri að eyða minningunum sínum um hvort annað,“ segir Erlendur um upphaf verkefnisins.

„Myndin skildi gerast úti í geimnum og við myndum sýna þessar birtingarmyndir ástarinnar í ferðalagi um hljóðheim plötunnar. 

Við bárum svo hugmyndina undir Icelandair sem var til í að styrkja verkefnið og það var í raun og veru það sem gerði okkur kleift að taka þetta alla leið.“

Nostalgía og vísindaskáldskapur

Hann segir innblásturinn meðal annars koma frá vísindaskáldskap.

„Innblásturinn kom frá mikið af ljósmyndum sem við fundum en líka frá þessum nostalgíu sci-fi myndum eins og Solaris og Space Oddisey.

Við ákváðum það mjög snemma að taka myndina upp á 16mm filmu til að gefa myndinni ákveðna áferð og ég var spenntur fyrir kvikmyndalegu nálguninni sem þú þarft að vera með til að skjóta á filmu nú til dags.“

Verkefnið gekk vel að sögn Erlends.

„Það var bara frábært að vinna með Birni og Bríet ásamt öllum listamönnunum sem komu að verkinu. Við erum í skýjunum með myndina.“

Ólík listform koma saman í eitt

Erlendur hefur komið víða að í sínum bransa og segist almennt hrifinn af því að blanda ólíkum listformum saman.

„Þetta tónlistarmyndarformat tíðkast víðs vegar um heim og ég hef verið mikill aðdáandi þess. Mér finnst til dæmis það sem tónlistarmenn á borð við The Weekend, Asap Rocky og Taylor Swift eru að gera í sínum kvikmyndaverkefnum vera mjög inspírerandi.

Ég hef verið svo lánsamur að vinna mikið með tónlistarfólki í gegnum tíðina og hef gert fjölmörg tónlistarmyndbönd, en þetta er í raun fimmta tónlistarmyndin sem ég geri. 

Afsakanir (Auður), Svarthvítur Draumur (Hipsumhaps), Flýg upp x Varlega (Aron Can), Hugarró (GDRN) og svo núna 1000 orð (Birnir og Bríet). Mér þykir ótrúlega vænt um þessi verkefni.“

Viðtökurnar hafa að sögn Erlends verið frábærar.

„Við héldum sérstaka sýningu í Silfurbergi á útgáfutónleikum þeirra sem var alveg epískt því þá fylgdu þau myndinni eftir með live flutningi á plötunni í bland við helstu slagara þeirra beggja.

Svo var stórkostlegt að sýna hana í Háskólabíó sem opnunarmynd RIFF fyrir fullu húsi gesta. Nú er hún aðgengileg á Youtube og mun lifa þar um ókomna tíð,“ segir Erlendur að lokum en hér má sjá myndina á Youtube.