Mis­bauð með­ferð á hundunum og mátti hætta á nám­skeiði

Í úrskurði Kærunefndar vöru- og þjónustukaupa segir að konan hafi skráð sig á grunnnámskeið fyrir hunda hjá hundaþjálfaranum og greitt 65 þúsund krónur fyrir námskeiðið með millifærslu á bankareikning þjálfarans þann 26. febrúar 2024. 

Í kvörtun hafi komið fram að henni hafi misboðið meðferð þjálfarans á hundunum og hafi tekið ákvörðun eftir þriðja tímann að mæta ekki oftar. Konan hafi vísa til þess að þjálfarinn hafi beitt aðferðum sem voru til þess fallnar að valda þjáningu og hræðslu hjá hundunum. 

Konan hafi sent skilaboð á þjálfarann, sem er einnig kona, og tjá henni að hún myndi ekki mæta aftur en þjálfarinn hafi einnig tekið hana út af vefsvæði námskeiðsins þar sem kennslumyndbönd sem fylgdu með námskeiðinu var að finna. Í kjölfarið hafi konan óskað eftir því við þjálfarann að fá að hlusta á kennslumyndböndin, enda hafi hún verið búin að greiða fyrir námskeiðið. 

Þurfti að „hasta á“ hundinn

Konan hafi byggt á því að hún hafi ekki mætt í sjö tíma af tíu auk þess sem hún hafi ekki getað nýtt sér fræðsluefni eða kennslumyndbönd fyrir þá tíma. Konan hafi gert kröfu um fulla endurgreiðslu og vísað til þess að hún hafi ekki getað nýtt sér þá fræðslu sem hún hafi greitt fyrir auk þess sem þjónustan hafi ekki verið í samræmi við lýsingar þjálfarans á námskeiðinu eða aðferðum sem er beitt við meðferð dýranna. 

Þjálfarinn hafi vísað til þess að í fimmta tíma námskeiðsins hafi hún notað hund konunnar í sýnikennslu, eftir boð frá henni. Konan hafi lýst hundinum sínum sem óþægum og viljað því aðstoð. Þjálfarinn hafi kveðist hafa þurft að „hasta á hann“ en hundurinn hafi í kjölfarið verið mjög þægur. Konan hafi tekið brosandi á móti hundinum. 

Kvartaði undan þjálfaranum á Facebook

Að tímanum loknum hafi konan birt færslu um þjálfarann á fjölmennum Facebook-hópi. Þjálfarinn hafi kveðist hafa fjarlægt konuna af vefsvæði námskeiðsins eftir að hún tjáði henni að hún myndi ekki mæta aftur og bent á að fyrirlestrarnir séu eingöngu fyrir fólk sem mæti í verklegu tímana. 

Loks hafi þjálfarinn bent á að á blaði sem þátttakendur fái afhent í fyrsta tíma námskeiðsins komi fram að námskeið sé selt í heilu lagi og að fólk komi á eigin ábyrgð. Þá standi á töflu uppi á vegg í námskeiðinu: „ef þú ert ekki tilbúin í eitthvað segir þú bara pass“. Þjálfarinn hafi vísað til þess að hún hafi yfir 40 ára reynslu af þjálfun hunda. 

Konan hafi hafnað því að hafa boðið þjálfaranum að nota hund sinn í sýnikennslu og ítrekað að þjálfarinn hafi beitt hundinn ofbeldi. Þá hafi konan á að hún hafi ekki mætt í fimmta tíma en umrætt atvik hafi átt sér stað í fjórða tíma námskeiðsins. 

Ófrávíkjanlegar reglur um afpöntun

Í úrskurði kærunefndarinnar eru ófrávíkjanleg ákvæði laga um neytendasamninga reifuð. Þar segir meðal annars að neytandi hafi fjórtán daga frest til að falla frá fjarsölusamningi samkvæmt lögunum og þurfi ekki að tilgreina neina ástæðu fyrir ákvörðun sinni um að falla frá samningi.

Þá segir einnig að hafi seljandi ekki veitt neytanda upplýsingar um rétt til að falla frá samningi, í samræmi við framangreint ákvæði, renni réttur neytanda til að falla frá samningi út tólf mánuðum eftir að upphaflega frestinum lýkur.

Þar sem konan hafi ekki verið upplýst um réttinn til að falla frá samningi hafi henni verið heimilt að falla frá samningnum þremur vikum eftir að hann var gerður.

Þar sem námskeiðið hafi verið hálfnað þegar konan skráði sig úr því bæri þjálfaranum að endurgreiða henni helming gjaldsins, 32.500 krónur.