Mourinho fékk rautt spjald en liðið hans tók stig af Man. Utd

Jose Mourinho var að sjálfsögðu í sviðsljósinu þegar lið hans mætti gömlum lærisveinum Portúgalsans í Evrópudeildinni í kvöld.

Fenerbahce gerði 1-1 jafntefli við Manchester United á heimavelli sínum.

Christian Eriksen kom United í 1-0 strax á fimmtándu mínútu eftir stoðsendingu frá Joshua Zirkzee.

Leikmenn tyrkneska liðsins komu öflugir til baka eftir hálfleiksræðu Mourinho og Youssef En-Nesyri jafnaði metin á fjórðu mínútu í seinni hálfleik.

Mourinho var kannski aðeins of æstur því hann fékk rauða spjaldið frá Clement Turpin dómara á 58. mínútu.

Fleiri urðu mörkin ekki og United menn eiga því enn eftir að vinna leik í Evrópu í vetur.

Eftir þetta jafntefli þá er United liðið aðeins í 21. sæti í Evrópudeildinni með þrjú jafntefli í þremur leikjum.

Lærisveinar Mourinho í Fenerbahce eru í 14. sæti með fimm stig en liðið hefur enn ekki tapað leik í deildarkeppninni.