Hillary hrífur Cheney

Dick Cheney, fyrrverandi varaforseti Bandaríkjanna, lofar framgöngu Hillary Clinton í embætti utanríkisráðherra í Bandaríkjanna í hástert. Hann segir að áhugavert yrði að vita hvernig forseti hún yrði.

Forsetafrúin setur fjölmiðlabann á börnin sín

Carla Bruni, eiginkona Nicolas Sarkozy forseta Frakklands, segir að hún muni gera hvað sem er til þess að hindra það að barnið sem hún ber undir belti komist í kastljós fjölmiðla. Í samtali við TF1 sjónvarpsstöðina í Frakklandi sagði hún að hún myndi gera hvað sem í hennar valid stæði til þess að koma í veg fyrir að myndir af barninu kæmust í fjölmiðla. Bruni sagðist hafa gert alvarleg mistök í það eina skipti sem hún leyfði myndatökumönnum að taka myndir af tíu ára gömlum syni sínum, sem hún átti áður en hún kynntist Sarkozy. Bruni sagði líka að hún hefði ekki hugmynd um hvort hún ætti von á strák eða stelpu.

Fyrrverandi Frakklandsforseti ákærður

Jacques Chirac, fyrrverandi forseti Frakklands, hefur verið ákærður fyrir að hafa fjármagnað kosningasjóði sína með ólögmætum hætti þegar hann var borgarstjóri í París. Fréttavefur BBC segir hins vegar að óvíst sé hvort réttarhöld yfir forsetanum fyrrverandi geti farið fram því hann sé orðinn 78 ára gamall og berjist við minnisleysi. Ef réttarhöldin fara fram þykir næstum alveg víst að Chirac verði ekki viðstaddur þau. Chirac var borgarstjóri í París á árunum 1977 til 1995. BBC segir að viðurlögin við þeim brotum sem hann er ákærður fyrir geti verið allt að 10 ára fangelsi og sekt sem nemur um 25 milljónum króna.

Þrír merkir minnisvarðar skemmdir

Þrír sögufrægir minnisvarðar hafa verið skemmdir í Róm, höfuðborg Ítalíu að undanförnu. Í einu tilfellinu náðust myndir á öryggismyndavél af manni sem hjó tvö stykki úr gosbrunni í Piazza Navona. Nokkrum klukkustundum síðar sást maður henda steini í hinn fræga Trevi gosbrunn í miðborg Rómar. Lögreglan segist síðan hafa séð námsmann klífa upp vegg á Colosseum hringleikahúsinu fræga til þess að höggva af marmarastykki. BBC segir að lögreglan gruni að í einhverjum fyrrgreindra tilfella hafi getað verið um sama einstakling að ræða. Þrátt fyrir að bæði öryggismyndavélum og lögreglumönnum hafi verið fjölgað segir lögreglann það verða æ erfiðara að vernda ævaforn minnismerki í borginni.

Mengun gæti breytt ásýnd Þingvallavatns

Aukin bílaumferð um Þingvelli í kjölfar vegabóta á Lyngdalsheiði getur haft aukna mengun í för með sér í þjóðgarðinum. Auka þarf eftirlit með mengun frá veginum segir Ólafur Örn Haraldsson þjóðgarðsvörður á Þingvöllum.

Innflytjendamálin ekki lengur málið

Skoðanakannanir sýna enn yfirburði vinstri flokkanna í Danmörku, nú þegar rétt rúm vika er eftir til kosninga, eftir þriggja kjörtímabila samfellda stjórnartíð hægri manna. Efnahagsvandi ríkisins yfirgnæfir önnur kosningamál.

Fylgistap hjá flokki Merkel

Flokkur Angelu Merkel kanslara Þýskalands tapaði verulegu fylgi í kosningum í sambandsríkinu Mecklenburg-Vorpommern í gær. Útgönguspár bentu til þess að Kristilegi demókrataflokkurinn, flokkur Merkel, hlyti 24 prósent atkvæða. Það er tæpum fimm prósentum minna en í síðustu kosningum.

Mikið mannfall í Sýrlandi síðustu daga

Fjöldi fólks lét lífið í mótmælum í Sýrlandi um helgina og margir til viðbótar voru handteknir. Alþjóðanefnd Rauða krossins er í höfuðborginni til að skoða aðbúnað særðra og aðgang að þeim sem eru í haldi lögreglu.

Alþingi að ljúka olíuumræðu

Frumvarp iðnaðarráðherra um leit, rannsóknir og vinnslu kolefnis verður til þriðju og síðustu umræðu á Alþingi í dag. Þá verða einnig rædd tvö frumvörp fjármálaráðherra um skattlagningu á kolvetnisvinnslu, en þau eru til annarrar umræðu.

Friðarviðræður í Líbíu fóru út um þúfur

Samningaviðræður uppreisnarmanna í Líbíu um að fylgjendur Gaddafis í borginni Bani Walid gæfust upp hafa farið út um þúfur. Í morgun vonuðust uppreisnarmennirnir hins vegar til þess að þeir gætu tekið borgina yfir án þess að til bardaga þyrfti að koma.

Eldandi fjölskyldumaður í London

Sálar popparinn og eitísgoðið Paul Young heldur tónleika í Hörpu í byrjun október. Kjartan Guðmundsson sló á þráðinn til söngvarans í London, fræddist um smellina, röddina og átrúnaðargoðin og náði að kría út úr honum uppskrift að dýrindis pastasósu.

Segir vændisstarfsemi viðgangast á stefnumótasíðu

Verkefnastýra hjá Stígamótum segir vændisstarfsemi viðgangast á íslenskri stefnumótasíðu þar sem fólk selur meðal annars kynlífsmyndbönd af sjálfu sér. Eigandi síðunnar þvertekur fyrir að um vændi sé að ræða, síðan sé ætluð fólki sem aðhyllist svokölluð djörf stefnumót.

Indverskir læknar á Fjórðungssjúkrahúsinu á Akureyri

Við Sjúkrahúsið á Akureyri starfa nú nokkrir indverskir læknar. Framkvæmdastjóri lækninga segir sjúkrahúsið leita til útlanda eftir starfskröftum þegar engar umsóknir berist frá íslenskum læknum.

Setti bílrúðuvökva í drykk starfsmanns

Starfsmaður á meðferðarheimilinu Geldingalæk þurfti að leita sér aðhlynningar á spítala eftir að unglingur á heimilinu laumaði eitruðum vökva í glas hjá honum.

Fjársjóðsleit við Íslandsstrendur

Sesselja Ómarsdóttir dósent lærði að kafa á síðasta ári. Ástæðan fyrir því var áhugi hennar á lífverum undirdjúpanna sem mögulega er hægt að nýta í lyf framtíðarinnar. Sesselja sagði Sigríði B. Tómasdóttur frá því hvað getur leynst á hafsbotninum.

Bjarni Benediktsson hefur efasemdir um jarðarkaup Nubos

Það þarf að fara mjög vandlega yfir það hvaða skilyrðum það á að vera háð þegar aðilar ytan Evrópska efnahagssvæðisins sækjast eftir því að kaupa jarðir og lönd á Íslandi, segir Bjarni Bendiktsson, formaður Sjálfstæðisflokksins, í samtali við Vísi. Bjarni segir það alls ekki vera sjálfgefið að fallast eigi á slíkt í öllum tilvikum. Kínverski auðjöfurinn Huang Nubo hefur, sem kunnugt er, sóst eftir að kaupa 300 ferkílómetra á Grímsstöðum á Fjöllum.

Flugvél hvolfdi á Hellu

Flugvél hvolfdi eftir að henni hlekktist á í flugtaki á Helluflugvelli í gærkvöld. Tveir voru í flugvélinni þegar atvikið átti sér stað en þá sakaði ekki. Lögreglan á Hvolsvelli og Rannsóknarnefnd flugslysa rannsaka málið.

Lúðvík tekur sæti á Alþingi

Lúðvík Geirsson hefur ákveðið að taka sæti Þórunnar Sveinbjarnardóttur á Alþingi á morgun. Þórunn tilkynnti óvænt á þingfundi á föstudaginn að hún hygðist láta af þingstörfum og setjast á skólabekk í Háskóla Íslands.

Dýrbítar drápu þrettán kindur

Að minnsta kosti þrettán kindur hafa drepist á tveimur vikum vegna dýrbíta sem ganga lausir í Rangárvallasýslu. Allt bendir til þess að dýrbítarnir séu hundar, samkvæmt upplýsingum frá lögreglunni á Hvolsvelli. Sjö kindur fundust dauðar í Vestur-Landeyjum aðfararnótt laugardagsins ásamt þremur særðum lömbum. Í vikunni áður var búið að drepa þrjú lömb í Vestur - Landeyjum. Þá fundust jafnframt þrjú dauð lömb í Fljótshlíðinni.

Ekið á tíu ára barn

Ekið var á tíu ára gamlan dreng á hjóli í Laugardalnum um fimmleytið í dag. Hann var fluttur á slysadeild. Talið er að drengurinn hafi fótbrotnað en ekki er vitað um frekari meiðsl, samkvæmt upplýsingum frá sjúkraflutningamönnum. Drengurinn var með hjálm á höfðinu þegar óhappið varð.

Líðan konunnar stöðug

Þyrla Landhelgisgæslunnar lenti við Landspítalann í Fossvogi rétt fyrir klukkan tvö í dag með konu sem hafði veikst alvarlega í Hvannagilshnausum, sunnan við Álftavatn, fyrir hádegi í dag. Læknir á bráðamóttöku spítalans segir að ástand konunnar sé stöðugt en ekki liggur fyrir nákvæmlega hvers eðlis veikindi hennar eru.

Hópur fólks handtekinn fyrir að efna til vatnsslags

Hópur ungs fólks sem boðaði til vatnsslags í almenningsgarði í Teheran höfuðborg Írans var handtekinn vegna uppátækisins á föstudaginn. Boð voru send út um slaginn á Facebook og var fólk hvatt til að mæta með vatnsbyssur og vatnsblöðrur. Lögreglustjóri staðfestir við írönsku fréttastofuna Mehr að fólkið hafi verið handtekið. Hann segir að fólk sem taki þátt í gjörningi af þessu tagi sé annað hvort heimskt eða beri enga virðingu fyrir lögunum. Hann segir að hart verði tekið á þeim sem efni til slíkra viðburða.

Íbúðin í Arnarsmára ónýt

Íbúðin við Arnarsmára í Kópavogi sem kviknaði í fyrr í dag er ónýt, samkvæmt upplýsingum frá lögreglunni. Eldurinn kom upp rétt fyrir klukkan ellefu. Varðstjóri hjá slökkviliðinu segir að enginn hafi verið í íbúðinni. Slökkvistarfi var að mestu leyti lokið fyrir hádegi en eldur hafði þá kraumað í íbúðinni um stund.

Japanir þökkuðu fyrir sig

Töluverður fjöldi fólks lagði leið sína á viðburðinn ,,Brosandi börn" í Háskólann í Reykjavík í gær til að njóta japanskrar menningar og styðja börn á hamfarasvæðunum í Japan. Vinir Japans og samtökin Fræið í Háskólanum í Reykjavík stóðu fyrir viðburðinum, en tilgangurinn var meðal annars að þakka Íslendingum stuðning og samhug eftir hamfarirnar í vor. Dagskráin var fjölbreytt og gæddu gestir sér m.a. á sushi, kökum og tei, brutu pappír, teiknuðu, dönsuðu og kepptu í japönskum leikjum. Sýndar voru allar japanskar bardagaíþróttir og er það í fyrsta sinn sem það er gert á Íslandi.

Darling segir að Brown hefði átt að hætta fyrr

Alistair Darling, fyrrverandi fjármálaráðherra Breta, segir að hann hefði átt að þrýsta meira á Gordon Brown, fyrrverandi forsætisráðherra, um að láta af embætti forsætisráðherra. Fjármálaráherrann fyrrverandi sakar Brown um að hafa haldið of fast í völdin á meðan ringulreið og krísa ríkti í ríkisstjórninni.

Forsætisráðherra stendur við fyrri yfirlýsingar

Jóhanna Sigurðardóttir forsætisráðherra stendur að fullu við yfirlýsingar sínar um að hlutur launa í landsframleiðslu hefði lækkað mikið og aldrei verið lægri. Ummælin lét hún falla í umræðum á Alþingi á föstudaginn. Samtök atvinnulífsins rengja þessar tölur forsætisráðherrans Umrædd hlutföll, 59% og 72%, séu af hugtakinu vergum þáttatekjum, ekki landsframleiðslu. Vergar þáttatekjur eru mun lægri fjárhæð en verg landsframleiðsla, segja Samtök atvinnulífsins. Jóhanna Sigurðardóttir segist hafa stuðst við tölur Hagstofunnar og vísar ásökunum um rangfærslur á bug.

Jóhanna hvergi á förum

Jóhanna Sigurðardóttir forsætisráðherra er hvergi á leið úr pólitík og mun leiða ríkisstjórnina í gegnum þann pólitíska vetur sem í vændum er, segir Helgi Hjörvar, þingmaður Samfylkingarinnar.

Má ekki einblína á virkjanagerð og verksmiðjur

Ólafur Ragnar Grímsson, forseti Íslands, segir að ekki megi einblína eingöngu á stórar fjárfestingar eins og virkjanagerð og verksmiðjuuppbyggingu í því augnamiði að efla atvinnulífið hér á landi. Árangur í hagkerfi tuttugustu og fyrstu aldarinnar felist fyrst og fremst í hugviti og þekkingu. Hann segir mikilvægt að líta til þess þótt það sé ekki alltaf stórt í sniðum.

Vonast til þess að ná stjórn á Bani Walid í dag

Bráðabirgðastjórnin í Líbíu vonast til þess að ná bænum Bani Waild, sem er eitt síðasta vígi Muammars Gaddafis, á sitt band án bardaga í dag. Uppreisnarmenn telja að Gaddafi hafi verið í felum í borginni ásamt tveimur sona sinna en flúið þaðan í gær.

Þyrlan sótti veika konu

Þyrla Landhelgisgæslunnar var kölluð út nú fyrir hádegið til að sækja konu sem veiktist alvarlega í Hvannagilshnausum, sunnan við Álftavatn. Von var á því að þyrlan myndi lenda á spítala í Reykjavík um hádegisbil. Ekki er vitað með vissu hvers eðlis veikindi konunnar eru.

Miklir vatnavextir í Múlakvísl

Rafmagnsmastur sem staðsett var í varnargarðinum við Múlakvísl féll í gærkvöldi en miklir vatnavextir hafa verið í ánni að undanförnu. Örlygur Jónasson starfsmaður hjá Rarik segist hafa fengið fréttir frá Vegagerðinni í gærmorgun um að varnargarðurinn gæti gefið sig og lét þá aftengja rafmagnslínuna, en um svokallaða tengilínu er að ræða sem flytur rafmagn á milli Víkur og Klausturs. Engin truflun varð þó á sambandi enda er um nokkurksonar varalínu að ræða. Samkvæmt upplýsingum frá Veðurstofunni stafa vatnavextirnir fyrst og fremst vegna mikilla rigninga síðustu daga sem og bráðnun jökla en farið er að sjatna í ánni nú.

Búið að slökkva eldinn í Arnarsmára

Búið er að slökkva eldinn sem kom upp í íbúð í Arnarsmára í Kópavogi nú í morgun. Enginn var í búðinni þegar eldurinn kom upp, samkvæmt upplýsingum frá slökkviliðinu. Ekki liggur nákvæmlega fyrir hve miklar skemmdir urðu á íbúðinni.

Eldur í Arnarsmára

Eldur kom upp í íbúð í Arnarsmára í Kópavogi nú í morgun. Enginn er í íbúðinni, samkvæmt upplýsingum frá slökkviliðinu. Við segjum nánar frá þessu síðar í dag þegar meiri upplýsingar hafa borist.

Gaddafi flúinn frá Ban Walid

Muammar Gaddafi, fyrrverandi einræðisherra Líbíu, er sagður hafa flúið frá bænum Bani Walid eftir að uppreisnarmenn gáfu stuðningsmönnum hans stuttan tíma til að gefast upp í gær. Uppreisnarmenn segja að þeir muni ekki gefast upp fyrr enn Gaddafi náist, lífs eða liðinn.

Þúsundir manna á Ljósanótt

Talið er að allt að 60 þúsund manns hafi verið á Ljósanótt í Reykjanesbæ í gær, laugardag. Hátíðin náði hámarki með stórglæsilegri flugeldasýningu sem björgunarsveitamenn sáu um. Hátíðin fór að mestu leyti vel fram en þó handleggsbrotnaði níu ára gömul stúlka í gær þegar hún festi hendina í leiktæki í tívolíinu og var hún flutt með sjúkrabíl á sjúkrahús. Lögreglan segir að fjöldi fólks hafi skemmt sér frameftir nóttu og næturlífið hafi farið vel fram.

Strauss-Kahn kominn heim

Dominique Strauss-Kahn, fyrrverandi framkvæmdastjóri Alþjóðagjaldeyrissjóðsins, kom til Parísar um fimmleytið í nótt að íslenskum tíma ásamt eiginkonu sinni. Þau hafa verið í New York í Bandaríkjunum allt frá því að Strauss-Kahn var handtekinn og sakaður um að hafa brotið kynferðislega gegn herbergisþernu á hóteli í maí. Hann hefur alltaf neitað ásökunum og málið hefur nú verið fellt niður vegna ótrúverðugleika herbergisþernurnar. Strauss-Kahn sagði upp störfum hjá Alþjóðagjaldeyrissjóðnum fljótlega eftir að hann var handtekinn.

Dominique Strauss-Kahn líklegast á heimleið

Fyrrverandi framkvæmdastjóri Alþjóðagjaldeyrissjóðsins, Dominique Strauss-Kahn, yfirgaf íbúð sína í New York í dag. Talið er að hann hafi ætlað til Frakklands, en það er heimaland hans.

Jörð skelfur víða

Jörðin skelfur víðar en í Kötlu. Nokkrir skjálftar hafa mælst á Reykjanesi í kvöld. Líkt og í Kötlu eru skjálftarnir undir þremur á Richter. Jón Frímann Jónsson, sem fylgist með jarðhræringum, sagði á vefsíðu sinni í dag að Katla væri byrjuð að bólgna út, sem venjulega þýðir að kvika streymi inn í eldstöðina. Þó er ekki fullvíst hvað er á seyði og jarðskjálftafræðingar á Veðurstofunni eru rólegir yfir stöðu mála.

Nasistaforingi deyr 97 ára að aldri

Ungverski Nasistinn Sandor Kepiro lést í dag. Hann var um tíma einn mest eftirlýsti Nasisti í heimi. Kepiro var 97 ára gamall Réttað var yfir honum vegna stríðsglæpa í Búdapest í vor og telur lögmaður hans að hann hafi orðið mjög veikur af þeim réttarhöldum. Hann var sakaður um að bera ábyrgð á dauða 36 gyðinga og Serba árið 1942.

Lottóvinningurinn gekk ekki út

Það var enginn með allar réttar l lottóinu í kvöld. Fyrsti vinningur sem var rúmar fimm milljónir gekk því ekki út. Tölurnar voru 10 15 16 20 39 og bónustalan var 36. Það var heldur enginn með allar fimm Jókertölurnar réttar í réttri röð. Tölurnar voru 5 5 5 5 5. Einn var með fjórar réttar Jókertölur í réttri röð. Hann fær 200 þúsund krónur í sinn hlut.

Alvarlegt slys á Ljósanótt

Alvarlegt slys varð í leiktæki á hátíðarsvæði á Ljósanótt í dag. Níu ára gömul telpa hlaut opið beinbrot og ljótan áverka þegar hún festi handlegg í tívolítæki. Hún var flutt með sjúkrabíl til Reykjavíkur í aðgerð, eftir því sem fram kemur á vef Víkurfrétta. Þar segir jafnframt að leiktækið hafi verið tekið úr umferð um tíma en síðan aftur tekið í notkun eftir að breytingar höfðu verið gerðar á því. Engar upplýsingar var að hafa um málið þegar Vísir leitað þeirra hjá lögreglu.

Skjálftahrina í Kötlu

Svo virðist sem jarðskjálftahrina hafi hafist í Kötlu í dag. Hingað til eru stærstu skjálftarnir innan við 3 á Richter á 1,1 kílómetra dýpi. Jón Frímann Jónsson, sem fylgist mikið með jarðhræringum á Íslandi, segir hins vegar að gæði skjálftanna séu góð. Flestir skjálftar eiga upptök sín í Hábungu. Jarðskjálfti var einnig í Kötlu í gær og var hann yfir þrír.

Lítil nýliðun meðal augnlækna áhyggjuefni

Formaður Augnlæknafélags Íslands segir fækkun augnlækna hér á landi geta valdið því að sérþekking á ákveðnum sviðum hverfur. Það getur tekið allt að tíu ár að þjálfa nýja sérfræðinga í augnlækningum.

Þúsundir skelltu sér á Hamraborgarhátíð

Þúsundir Kópavogsbúa nutu veðurblíðunnar á Hamraborgarhátíð í Kópavogi í dag. Hamraborginni var breytt í göngugötu, sölutjöldum var slegið upp og um 120 manns seldu gamalt dót og nýtt beint úr skottinu á bílnum sínum.

Skotinn í hálsinn í átökum glæpasamtaka

Tveir ungir menn eru alvarlega særðir eftir að þeir voru skotnir margsinnis í Køge í nótt. Annar mannanna er leiðtogi glæpasamtakanna Black Cobra, segir fréttastofa TV2. Mennirnir voru skotnir um hálffjögurleytið í nótt að dönskum tíma, eða um hálftvö að íslenskum. Lögreglan á Mið- og Vestursjálandi segir að ástæður skotárásarinnar sé persónulegt uppgjör. Fréttavefur Ekstrabladet fullyrðir að annar mannanna hafi verið skotinn í hálsinn.