Stones tryggði City sigur í uppbótatíma

John Stones var hetja ensku meistaranna í dag. Hann skoraði sigurmark Manchester City á fimmtu mínútu í uppbótartíma þeagr City vann 2-1 útisigur á Wolves. Miðvörðurinn kom sínu liði líka á toppinn í ensku úrvalsdeildinni.

Það stefndi í þriðja jafntefli City í fjórum leikjum þegar Stones kom fram og skallaði inn hornspyrnu Phil Foden. Stone tryggði City stig á móti Arsenal á dögunum og er því heldur betur að skora mikilvæg mörk fyrir liðið þessar vikurnar.

Lærisveinar Pep Guardiola náðu tveggja stiga forystu á Liverpool á toppnum en Liverpool á leik inni á móti Chelsea á eftir.

Úlfarnir fengu draumabyrjun þegar Norðmaðurinn Jörgen Strand Larsen skoraði strax á sjöundu mínútu eftir frábæra sókn og stoðsendingu frá Nélson Semedo.

Semedo fékk einnig færi til að skora þegar hann slapp í gegn en náði ekki að nýta sér það.

José Sá stóð í marki Úlfanna í þessum leik og varði tvisvar frábærlega frá City mönnum í fyrri hálfleiknum, fyrst frá Bernando Silva og svo frá Savinho.

Sá kom aftur á móti engum vörnum við á 33. mínútu þegar Josko Gvardiol skoraði stórglæsilegt mark með frábæru langskoti.

City liðið hafði yfirburði á flestum sviðum í fyrri hálfleiknum en staðan var engu að síður 1-1 í hálfleik.

Svipaða sögu er að segja af seinni hálfleiknum. City liðið var miklu meira með boltann en fann ekki leiðir fram hjá Sá í markinu.

Það var ekki fyrr en komið var fram í uppbótartíma þegar bjargvætturinn Stones birtist. Dómari leiksins dæmdi markið fyrst af en snérist hugur þegar hann fór í skjáinn.