Út­salah á mörkum í Lundúnum

Tottenham tók á móti toppliði Liverpool í lokaleik dagsins í ensku úrvalsdeildinni í fótbolta í dag en gestirnir léku heimamenn sundur og saman á löngum köflum.

Vörn Tottenham virkaði bæði ósannfærandi og óörugg og var liðið í algjörri nauðvörn trekk í trekk. Gestirnir hefðu hæglega getað skorað töluvert fleiri mörk en létu sex duga.

Heimamenn klóruðu aðeins í bakkann og breyttu stöðunni úr 1-5 í 3-5 en fengu svo sjötta markið í andlitið skömmu seinna. Það var svo sem ekkert hægt að kvarta yfir sóknarleik Tottenham í dag, þrjú mörk ættu að duga til sigurs í flestum leikjum, en þegar vörnin er hriplek duga þrjú mörk skammt.

Mohammed Salah var að öðrum ólöstuðum langbesti leikmaður vallarins í dag, skoraði tvö mörk og lagði upp tvö. Ótrúlegt tímabil hjá Salah hingað til en hann er kominn með 15 mörk í 16 leikjum og ellefu stoðsendingar ofan á það. 

Lokatölur í Lundúnum 3-6 og Liverpool-menn sitja aleinir í toppsæti deildarinnar, fjórum stigum á undan Chelsea og eiga leik til góða.