Lenti á Keflavíkurflugvelli með veikan farþega

Farþegaþota frá flugfélaginu United Airlines lenti á Keflavíkurflugvelli nú fyrir stundu með veikan farþega innanborðs.

Vélin fór frá London fyrr í dag og átti að lenda í San Francisco í Bandaríkjunum nú í kvöld. Ekki liggur fyrir hversu alvarlega veikur farþeginn er, en hann var fluttur með sjúkrabíl á sjúkrahús.

Vélin er af gerðinni Boeing 777 en ekki var sérstakur viðbúnaður á Keflavíkurflugvelli vegna atviksins.

Samkvæmt upplýsingafulltrúa Isavia, mun farþeginn verða eftir hér á landinu og flugvélin halda leið sinni áfram seinna í kvöld.