Lesbískar Barbídúkkur á umdeildu dagatali

Framleiðendur Barbí eru æfir og ætla að lögsækja listamenn sem búið hafa til dagatal með nektarmyndum af Barbídúkkum í lesbískum ástarlotum.

Argentínsku listamennirnir Breno Costa and Guilherme Souza segjast hafa unnið dagatalið í samvinnu við leikfangaframleiðandann Matcbox sem er í eigu framleiðenda Barbí, Matell.

Sumar myndir á dagatalinu sýna Barbí einfaldlega án klæða en á öðrum sjást Barbídúkkur í innilegum athöfnum með öðrum kvendúkkum. Listamennirnir segja að dagatalið eigi að endurspegla hvernig kynlíf er notað til að selja allan skapaðan hlut, þar á meðal leikföng sem ætluð eru börnum.

Talsmaður Mattell í Evrópu, Stephanie Wegener, fordæmir myndirnar. „Við viljum ekki að Barbí sé myndbirt á þennan hátt, sér í lagi ekki með vörumerkinu okkar. Við munum lögsækja þessa menn.“