Dómur stúlknanna í Prag styttur

Dómur íslensku stúlknanna tveggja sem teknar voru fyrir fíkniefnasmygl í Prag í Tékklandi árið 2012, var í dag styttur úr sjö og hálfu ári í fjögur og hálft ár.

„Dómarinn tók tillit til þess hversu ungar þær eru og að þær hefðu ekki gert sér grein fyrir því hvað þær voru að gera. Þessi dómari var mun tillitssamari en fyrri dómari,“ segir Þórir Gunnarsson, aðalræðismaður Íslands í Tékklandi.

Stúlkurnar, sem eru 20 ára, áfrýjuðu fyrri dómi og liggur nú endanlegur dómur fyrir. Afplánun hefst strax og fara þær í sama fangelsi. Áður voru þær hvor í sínu fangelsinu.

„Nú fara þær í að sækja um flutning til Íslands og þurfa þær að gera það sjálfar. Málið er allt í farvegi en þetta tekur alltaf vissan tíma.“

Þórir segir stúlkurnar sáttar með niðurstöðuna.

Aðalsteina Líf Kjartansdóttir og Gunnhildur Svava Guðmundsdóttir voru handteknar fyrir fíkniefnasmygl á Vaclav Havel flugvellinum í Prag, höfuðborg Tékklands, í nóvember 2012. Þær höfðu flogið til Prag frá Sao Paulo í Brasilíu, þar sem þær samþykktu að gerast burðardýr. Fíkniefnin voru afar haganlega falin í farangurstösku stúlknanna. Upphaflega stóð til að þær gleyptu fíkniefnin og smygluðu þeim milli landa innvortis.

Þær millilentu í München í Þýskalandi og í Prag voru þær handteknar þar með mikið magn af kókaíni í fórum sínum. Þær voru svo úrskurðaðar í sjö mánaða gæsluvarðhald.

Stúlkurnar þurfa að afplána tvo þriðju hluta dómsins áður en þær geta sótt um náðun.