Unnið að því að fá Aðalsteinu og Gunnhildi heim

Unnið er að því að fá íslensku stúlkurnar sem afplána fangelsisdóma fyrir kókaínsmygl í Tékklandi, framseldar hingað til lands. Gert er ráð fyrir að formlegt framsalsferli hefjist á næstu dögum.

Aðalsteina Kjartansóttir og Gunhildur Gunnarsdóttir voru handteknar á Vaclav Havel-flugvellinum í Prag, höfuðborg Tékklands níunda nóvember 2012, en þá voru þær átján ára gamlar.  Í fórum þeirra fundust þrjú kíló af kókaíni, sem eru um sextíu þúsund söluskammtar samkvæmt tékkneskum dómstólum.

Viðurlög við fíkniefnasmygli eru afar hörð í Tékklandi og voru Aðalsteina og Gunnhildur dæmdar í sjö og sjö og hálfs árs fangelsi í nóvember á síðast ári. Í febrúar mildaði áfrýjunardómstóll refsinguna niður í fjögur og hálft ár. Fram að því höfðu stúlkurnar setið inni í sitthvoru fangelsinu í Prag, en eftir að dómarnir voru mildaðir voru þær báðar fluttar í Swětla-fangelsið, sem er í um200 kílómetra fjarlægð frá höfuðborginni.

Á Íslandi er í gildi Evrópusamningur um framsal fanga og síðan stúlkurnar voru fluttar hefur staðið til að þær verði framseldar til Íslands til að afplána það sem eftir er af dómunum.

Að sögn Þóris Gunnarssonar, fyrrverandi ræðismanns Íslands í Tékklandi, er verið að gera verksamning við lögfræðing stúlknanna um fangaflutningana. Samkvæmt heimildum fréttasofu stranda þær viðræður á peningaþætti, en stúlkurnar þurfa að greiða fram háan lögfræðikostnað svo formlegt ferli geti hafist.

Þórir segir Innanríkisráðuneytið vera vel upplýst um stöðu mála og undirbúið undir að fá framsalsbeiðni stúlknanna inn á sitt borð. Beiðnin er afgreidd í samvinnu við lögreglu og fangelsismálastofnun. Ef allt gengur upp eru stúlkurnar því á leið heim á næstu mánuðum.