Lík fannst í ferðatösku á lestarstöð

Lögreglan í Japan vinnur nú að því að bera kennsl á lík fullorðinnar konu sem fannst í ferðatösku á lestarstöð í Tókíó á dögunum. Taskan hafði verið skilin eftir inni í skáp á lestarstöðinni í lok apríl en var færð í óskilamuni nú fyrir skemmstu.

Starfsmenn lestarstöðvarinnar ákváðu að opna töskuna. Þeir segjast hafa fundið mikinn óþef og séð hár og kölluðu þá til lögreglu sem nú er með málið til rannsóknar.

Líkið er kona á aldrinum 70 til 90 ára, um 140 sentímetrar á hæð. Taskan var 70 sentímetrar á lengd og 50 sentímetrar á breidd.