Sigruðu í LEGO-hönnunarkeppninni

Liðið Einn + níu úr Grunnskóla Reyðarfjarðar sigraði í dag í tækni-og hönnunarkeppni grunnskólanema, FIRST LEGO League. Þar með tryggði liðið sér þátttökurétt á heimsmeistaramóti FIRST LEGO League í St. Louis í Bandaríkjunum í vor.

Alls tóku 18 lið víðs vegar af landinu þátt í keppninni sem fór fram í Háskólabíói. Í hverju liði voru á bilinu 6-10 manns á aldrinum 9-16 ára og voru þátttakendur því hátt í 200 talsins.

Þema keppninnar í ár var „Skóli framtíðarinnar“ og þurftu keppendur meðal annars að forrita vélmenni úr tölvustýrðu Mindstorms-legói til að leysa tiltekna þraut sem tengdist þemanu.

Þegar stigin í keppninni höfðu verið talin reyndist liðið Einn + níu sigurvegari. Í viðurkenningarskyni fyrir sigurinn hlaut liðið forláta LEGO-bikar og 150 þúsund króna úttekt frá aðalbakhjarli keppninnar, Nýherja, auk áðurnefnds þátttökuréttar í Bandaríkjunum.

Þá voru einnig veitt verðlaun í eftirfarandi flokkum:

Besta dagbókin: Gemsarnir úr Grunnskóla Hornafjarðar.

Besta lausn í hönnun og forritun vélmennis: LegóFásk úr Gunnskóla Fáskrúðsfjarðar.

Vélmennakapphlaup: Lið Breiðholtsskóla.

Besta rannsóknaverkefnið: Nafnlausar úr Brúarásskóla á Fljótsdalshéraði.