Samdi tónlist fyrir Netflix seríuna Vikings: Valhalla: „Maður verður ótrúlega meyr að heyra tónlistina sína í svona mögnuðum þáttum“

Mikil næmni fyrir tíðni hljóða

„Áhuginn fyrir tónlist hefur í raun alltaf verið til staðar hjá mér og sérstaklega kvikmyndatónlist. Ég ólst upp við ömmu mína Eddu Skagfield syngja, sem að fyrir mína tíð söng mikið með Hauki Morthens og langafi minn Sigurður Skagfield var óperusöngvari, þannig tónlist hefur verið ríkjandi í fjölskyldunni,“ segir Karlotta. Samband hennar við tónlist átti svo eftir að þróast mikið og breytast með árunum.

„Ég hef alltaf verið afskaplega næm fyrir tíðni hljóða og þegar ég var yngri þá olli það mér miklum erfiðleikum. 

Ég skildi lítið í því af hverju ákveðin hljóð létu mér líða líkamlega illa. Þegar ég varð eldri og fór að spila í hljómsveitum og svona þá fór ég að rannsaka þetta frekar og byrjaði á að taka upp allskonar hljóð, mixa þau saman og gera þau aðeins bærilegri fyrir mig og þar byrjaði áhuginn minn á hljóðhönnun sem ég vinn við líka í dag.“

Söng í jarðarför föður síns

Karlotta tók svo ákvörðun um að færa sig yfir í óperuna og fór að læra klassískan söng við Söngskólann í Reykjavík. Hún ætlaði sér í inn í óperu heiminn en varð fyrir miklu áfalli í upphafi námsins.

„Á sama tíma og ég byrjaði þar þá lést pabbi minn skyndilega og ákvað ég að syngja í jarðarförinni hans. Ég gaf allt sem ég átti í það en þar að leiðandi gat ég ekki sungið almennilega í langan tíma eftir þann atburð, þannig að það hafði mikil áhrif á skólagönguna mína í söngskólanum næstu fjögur árin.“

Út frá því fór Karlotta að einbeita sér að öðrum hliðum tónlistarheimsins.

„Þá fór ég aftur í það að semja tónlist og taka upp hljóð. Ég fann að ég þurfti að fara út í nám og læra það frekar, þannig ég flutti til London og fór í þriggja ára framhaldsnám í tónlist. 

Eftir fyrsta árið mitt þar byrjaði ég að vinna fyrir tónskáldið CJ Mirra og fékk mín fyrstu verkefni við kvikmyndir og heimildarmyndir í gegnum hann. Hann var minn mentor á þessum árum.“

Tónlistin breytti lífinu á fallegan hátt

Karlotta segir lífið hafa þróast á magnaðan hátt eftir að hún fór að vinna af fullum krafti í tónlistinni.

„Lífið hefur breyst svakalega en allt á svo ótrúlega fallegan hátt og ég er svo þakklát fyrir að geta unnið við það sem ég elska.

Ég er með stúdíó í Danmörku eins og er en svo ferðast ég til London eða Íslands þegar ég þarf fyrir verkefni. Ég er nýbúin að halda sýningu í London sem hét 'KS1 Exhibition' þar sem ég sýndi verkin mín ásamt því að búa til sérstök NTFs (Non-fungible token) sem að gestirnir fengu gefins.“ Þessi NTFs veita gestum frían aðgang að næstu sýningum og komandi efni frá Karlottu.

Þrátt fyrir að vinna við ástríðu sína segir Karlotta að bransinn geti verið erfiður. „Þetta er auðvitað virkilega krefjandi heimur og sérstaklega sem kona í bransanum, þá post-production bransanum, þarf maður að hafa mikið fyrir því að koma sér á framfæri, fá hlustun og margt er að varast. 

En sem betur fer er landslagið að breytast og það er að verða auðveldara fyrir konur að stíga inn í þennan geira.“

Með tónlist í Netflix seríu

Tónlistarbransinn snýst mikið um tengslanet og að koma sér á framfæri en Karlotta hefur náð gríðarlegum árangri á sínu sviði.

„Þetta var ótrúlega mikið network. Vinur minn Egill Ásdísarson kom mér í samband við Karl Örvarsson sem að þekkir Trevor Morris tónskáldið fyrir Vikings og er einnig með tónlist í þáttunum,“ segir Karlotta aðspurð um hvernig tónlistarverkefnið fyrir Vikings: Valhalla hafi komið til. „Hann var alveg viss um að Trevor yrði hrifinn af tónlistinni minni sem hann var. Trevor bað mig þá um að semja nokkur verk og syngja fyrir hann sem að enduðu í þáttunum. Sem er þvílíkur heiður að fá að gera. 

Sérstaklega í þætti númer sex, þar er ástarsena þar sem að tónlistin mín og söngur fær að njóta sín virkilega vel. Maður verður ótrúlega meir að heyra tónlistina sína í svona mögnuðum þáttum.

Ég hef verið að semja fyrir kvikmyndir áður og það var einmitt bresk mynd sem ég samdi og söng fyrir nýlega að koma út núna á Amazon prime en hún heitir A Banquet. En þetta er fyrsta Netflix serían sem ég sem fyrir.“

Mörg spennandi verkefni á döfinni

Karlotta hefur einnig unnið að íslenskum verkefnum og var að hefja samstarf með nýja snjallsímaforritinu OverTune.

„Ég kynntist Sigga, stofnanda og eiganda OverTune, bara síðasta sumar og við höfum verið að vinna aðeins saman að öðrum verkefnum. Það leiddi síðan út í það að ég samdi tónlist fyrir OverTune. Ég er virkilega spennt fyrir því samstarfi og hlakka til að sjá hvernig það þróast. Það er ótrúlega hæfileikaríkt fólk sem að stendur á bak við OverTune og það mun án efa ná langt, þetta er bara rétt að byrja. Ég mæli með að allir nái sér í appið þegar það kemur út fimmta mars og búi til skemmtilegt content!“

Það er nóg að gera hjá Karlottu í bransanum en hún slær ekki slöku við og heldur ótrauð áfram í spennandi verkefnum.

„Það sem er næst á döfinni hjá mér er önnur kvikmynd og síðan er ég að búa til tónlist fyrir tvo nýja tölvuleiki fyrir leikjafyrirtæki í Svíþjóð og hitt í London. Get því miður ekki sagt nöfnin á þeim strax en þetta er það er næst á dagskrá ásamt því að skipuleggja næstu sýningu, þá KS2 Exhibition.“