Hægri bakvörðurinn Alfons Sampsted, sem byrjaði alla þrjá leikina í Þjóðadeildinni í júní, hefur neyðst til að draga sig úr íslenska hópnum vegna meiðsla.
Alfons var í liði Bodö/Glimt gegn Haugesund í norsku úrvalsdeildinni í gær, í 1-1 jafntefli, en fór meiddur af velli eftir um klukkutíma leik.
Í hans stað hefur Arnar Þór Viðarsson kallað á Höskuld Gunnlaugsson, leikmann toppliðs Breiðabliks úr Bestu deildinni.
Alfons Sampsted á við meiðsli að stríða og getur ekki verið með A landsliði karla í komandi leikjum gegn Venesúela og Albaníu. Arnar Þór Viðarsson, þjálfari íslenska liðsins, hefur kallað Höskuld Gunnlaugsson úr Breiðabliki í hópinn og kemur hann til móts við liðið á mánudag. pic.twitter.com/Sv8cXQbQzx
— Knattspyrnusambandið (@footballiceland) September 18, 2022
Höskuldur hefur aðeins á síðustu misserum spilað sem hægri bakvörður fyrir Blika, eftir að hafa áður verið framar á vellinum, en hann er þó eini leikmaðurinn í íslenska hópnum núna sem spilar þá stöðu fyrir sitt félagslið.
Ísland mætir Venesúela á fimmtudaginn í vináttulandsleik í Austurríki en heldur svo til Albaníu til að spila síðasta leikinn í riðli Íslands í Þjóðadeildinni. Áður en að þeim leik kemur spila Ísrael og Albanía leik þar sem Ísrael getur með sigri tryggt sér efsta sætið í riðlinum. Að öðrum kosti verður leikur Albaníu og Íslands úrslitaleikur um efsta sætið en liðið sem endar efst kemst upp í A-deild Þjóðadeildar, fær sæti í 2. styrkleikaflokki fyrir undankeppni EM 2024, og öruggt sæti í umspili fyrir EM 2024 ef á þarf að halda.