Upplýsingafundur almannavarna vegna jarðhræringa á Reykjanesskaga og rýmingar í Grindavíkurbæ var haldinn klukkan 12:00 í dag.
Hægt er að horfa á fundinn í heild sinni hér fyrir neðan. Fundinum stýrði Víðir Reynisson sviðsstjóri Almannavarna. Hann fór yfir stöðu mála eftir atburði síðasta sólarhrings þar sem kvikuinnskot gerði vart við sig undir Grindavík.
Á fundinum voru einnig Fannar Jónasson, bæjarstjóri í Grindavík, Silja Bára Ómarsdóttir formaður Rauða krossins, Magnús Tumi Guðmundsson, jarðfræðingur og Benedikt Halldórsson fulltrúi frá Veðurstofu Íslands.
Vísindamenn telja miklar líkur á eldgosi á Reykjanesskaga eftir atburði gærkvöldsins. Grindvíkingar munu ekki fá að fara heim næstu daga eftir farsæla rýmingu í gærkvöldi. Ástandið er stöðugt endurmetið.
Land virðist hafa gliðnað um allt að 120 sentímetra. Jarðskjálftavirknin hefur færst nær hafi og kvikugangurinn lengst.
Þorvaldur Þórðarson, eldfjallafræðingur, segir að atburðir gærkvöldsins hafi verið óvæntir. Kvika hafi hlaupið suður og líkurnar á gosi, mögulega úti í sjó hafi aukist.
