Börsungar á bleiku skýi í Belgrað

Barcelona gerði góða ferð til Belgrað í Serbíu þegar lærisveinar Hansi Flick sóttu Rauðu stjörnuna heim í Meistaradeild Evrópu í kvöld. 

Leiknum lauk með 5-2 sigri gestanna sem hafa nú unnið sjö leiki í röð í öllum keppnum. Segja má að lið Börsunga trúi að sókn sé besta vörnin en liðið hefur nú skorað 15 mörk í aðeins fjórum Meistaradeildarleikjum.

Eftir að tapa 4-2 fyrir Osasuna þann 28. september síðastliðinn hefur Barcelona unnið hvern stórsigurinn á fætur öðrum og í kvöld var engin breyting á.

Gestirnir frá Katalóníu komust yfir áður en stundarfjórðungur var liðinn. Raphinha tók þá aukaspyrnu inn á teig sem Iñigo Martínez stangaði í netið. Raphinha var svo nálægt því að tvöfalda forystuna með skoti beint úr hornspyrnu en skotið small í stönginni.

Þegar rétt tæplega hálftími var liðinn tókst Rauðu stjörnunni að jafna metin. Það gerði með Silas með skemmtilegri afgreiðslu eftir að Rade Krunić renndi boltanum í gegnum vörn gestanna.

Undir lok fyrri hálfleiks – á markamínútunni frægu (43.) – þá kom markamaskínan Robert Lewandowski gestunum yfir eftir að hann fylgdi á eftir skoti Raphinha sem hafði smollið í stönginni, staðan 1-2 í hálfleik.

Síðari hálfleikur var ekki gamall þegar Lewandowski skoraði annað mark sitt og þriðja mark gestanna. Raphinha sjálfur skoraði svo með glæsilegu skoti örskömmu síðar og staðan orðin 1-4. 

Þegar stundarfjórðungur var til leiksloka fékk Fermín López boltann inn á teig og renndi honum snyrtilega í hornið fjær, staðan orðin 1-5. Hægri bakvörðurinn Jules Koundé átti stoðsendinguna í öllum mörkum liðsins í síðari hálfleik.

Milson minnkaði muninn fyrir heimamenn undir lok leiks en það breytti litlu, lokatölur í Serbíu 2-5 og Barcelona nú með níu stig í 6. sæti að loknum fjórum leikjum.