Íslendingur í Kaíró: Þetta var eins og að horfa á Ben-Hur

„Staðan er sú að öryggisverðir voru að berja á dyrnar hjá mér á hótelherberginu og báðu mig um að taka ekki myndir út á svölunum," segir fréttamaðurinn Jón Björgvinsson sem er staddur í Kaíró í Egyptalandi þar sem mótmælendur og stuðningsmenn Mubaraks berjast harkalega um Frelsistorg. Í miðju samtali við Vísi lýsti Jón því að hann væri að horfa á logandi Molotov-kokkteila fljúga yfir torgið auk þess sem herinn sprautaði vatni og táragasi yfir stríðandi fylkingar.

Það var upp úr hádegi í dag sem stuðningsmenn Hosni Mubaraks, forseta Egyptalands, réðust á mótmælendur. „Þetta var eins og að horfa á kvikmyndina Ben-Hur þegar ég sá riddarasveit koma ríðandi á hestum og úlföldum eftir götunum hérna," segir Jón sem var staddur nálægt torginu þegar átökin brutust út.

Hann segir átökin frekar frumstæð, mótmælendur og stuðningsmenn berjast með bareflum og steinum en ekki skotvopnum.

„Það eru kannski góðu fréttirnar," segir Jón sem hættir sér ekki út af hótelinu í kvöld vegna ástandsins. Jón segir átökin hafa í raun brotist út eftir að Mubarak tilkynnti að hann ætlaði að sitja áfram sem forseti fram að lýðræðislegum kosningum. Í kjölfarið hafi þúsundir gert atlögu að hópnum, en Jón telur að hópurinn líti svo á að þjóðin geti þolað stjórn Mubaraks í nokkra mánuði í viðbót.

„En það eru allir tiltölulega jafn þreyttir á honum," segir Jón sem segir almenning samt sem áður óttast ótryggt ástand og það virðist hafa orðið kveikjan að átökunum.

Aðspurður hvað taki nú við segir Jón að stuðningsmenn Mubaraks séu búnir að umkringja Friðartorgið og það sé augljóst markmið hópsins að ná því á sitt vald. Jón gerir ráð fyrir því að það gerist ekki án átaka.

Aðspurður segist Jón öruggur þar sem hann er núna.