Stjórnlagaþingskosningar gætu farið fram 16. júní

Forsætisráðherra hyggst skipa nefnd til að finna lausn á þeirri stöðu sem upp er komin vegna ákvörðunar Hæstaréttar um að ógilda kosninguna til stjórnlagaþings. Til greina kemur að kjósa á ný 16. júní ef það verður niðurstaða nefndarinnar.

Forsætisráðherra kynnti formönnum stjórnmálaflokkanna ákvörðun sína um að skipa nefnd á fundi í stjórnarráðshúsinu í dag. Sex fulltrúar verða í nefndinni en hver stjórnmálaflokkur skipar einn fulltrúa auk nefndarformanns sem forsætisráðuneytið tilnefnir. Nefndin hefur tvær vikur til að skila niðurstöðum en forsætisráðherra hyggst kalla eftir tilnefningum stjórnmálaflokkanna á morgun.

Jóhanna Sigurðardóttir segir það vera ljóst að það séu skiptar skoðanir um hvort það eigi að vera stjórnlagaþing en í sínum huga sé alveg ljóst að það sé góður meirihluti fyrir því á Alþingi. Sjálfstæðismenn hafi þó lýst vilja til þess að fara aðra leið.

Forsætisráðherra segir tvær leiðir helst koma til greina. Annað hvort boða til kosninga á ný frá upphafi, eða endurtaka kjördaginn með sömu framboðum.

Samkvæmt heimildum fréttastofu er rætt um 16. júní sem líklegan kjördag innan forsætisráðuneytisins, ef niðurstaða nefndarinnar verður að boða til kosninga á ný. Jóhanna staðfestir að þessi dagsetning hafi borið á góma í ráðuneytinu. Hún vill þó ekki staðfesta að 16. júní sé endanleg niðurstaða.

Bjarni Benediktsson, formaður sjálfstæðisflokksins, telur nefndina óþarfa enda eigi Alþingi að annast breytingar á stjórnarskránni. Hann segir sitt sjónamðið vera það að Alþingi eigi að sinna þessu hlutverki. Stjórnarskráin sjálf mæli fyrir um það og Alþingi sé ekkert að vanbúnaði að sjá um þetta hlutverk.