Játar að hafa leyft tugum karla að nauðga sofandi konu sinni

Réttarhöld sem þessi fara iðulega fram fyrir luktum dyrum en konan krafðist þess að þessi réttarhöld yrðu opin. Antoine Camus, lögmaður hennar, segir að mennirnir sem nauðguðu henni hefðu viljað hafa lokuð réttarhöld og þess vegna vildi hún að þau yrðu opin, samkvæmt frétt France24.

Camus segir að réttarhöldin muni reynast konunni gífurlega erfið. Hún muni þurfa að upplifa ítrekaðar nauðganir sem hún varð fyrir, þó hún muni ekki eftir þeim. Einhverjar upptökur af nauðgununum verða spilaðar í dómsalnum en bæði maðurinn og konan hafa setið andspænis hvort öðru í dómsal í vikunni.

Búist er við því að réttarhöldin muni standa yfir fram að jólum. Hér að neðan má sjá konuna og þrjú börn hennar mæta í dómsal á mánudaginn. Ein tveggja dætra þeirra þurfti að yfirgefa dómsalinn í gær þegar í ljós kom að faðir hennar hafði tekið nektarmyndir af henni og vistað á tölvu sinni.

Eiginmaðurinn, sem gengur undir nafninu Dominique Pelicot og er 71 árs. Konan, sem heitir Gisèle, er 72 ára. Hún hefur skilið við hann og breytt nafni sínu. Pelicot hefur játað brot sín en sagðist upprunalega hafa byrlað eiginkonu sinni svo hann gæti gert hluti sem hún neitaði og klætt hana í föt sem hún neitaði að klæðast. Seinna meir hafi hann byrjað að bjóða öðrum að taka þátt.

Hann hefur einnig verið ákærður fyrir nauðgun og morð á 23 ára konu sem átti sér stað árið 1991. Hann neitar því að hafa framið morðið en hefur játað að hafa reynt að nauðga nítján ára konu árið 1999 en þar fundust lífsýni sem bentu til þess að hann hafi reynt að nauðga konu.

Gómaður við að taka myndir undir pils kvenna

Árið 2020 hafði konan misst töluverða þyngd og hár hennar hafði þynnst á undangengnum árum. Hún átti einnig í vandræðum með minni sitt og mundi ekki eftir heilu dögunum. Börn hennar og vinir óttuðust að hún væri með Alzheimers.

Undir lok ársins var hún boðuð á lögreglustöð þar sem henni var gert ljóst hvernig eiginmaður hennar og hinir mennirnir hefðu brotið á henni.

Í september það ár hafði Pelicot verið gómaður við að reyna að taka ljósmyndir undir pils þriggja kvenna í verslunarmiðstöð og fundu lögregluþjónar rúmlega tuttugu þúsund ljósmyndir og myndbönd af mönnum nauðga eiginkonu hans í fórum hans, samkvæmt frétt New York Times.

Upprunalega var fjöldi grunaðra 83.

Hann hafði þá tekið fjölda manna upp nauðga konunni á heimilum þeirra nærri París og í bænum Mazan á milli áranna 2011 til 2020 og fundust einnig skilaboð á netinu þar sem hann hafði fundið ókunnuga menn til að nauðga henni. Mennina fann hann á netspjallborðinu „a son insu“ (á frönsku þýðir það „án þess að hún/hann viti“). Þar ræddu meðlimir vettvangsins sín á milli um nauðganir sem þeir framkvæma á konum, oft þegar búið er að byrla þeim.

Pelicot er sagður hafa mulið niður svefnpillur og set í mat hennar og drykki til að svæfa hana áður en hann fékk menn í heimsókn til að nauðga henni.

Í ljós hefur komið að konunni var nauðgað að minnsta kosti 92 sinnum af minnst 71 manni og tók eiginmaðurinn í einhverjum tilfellum þátt í nauðgununum og hvatti mennina áfram.

Búið er að bera kennsl á 51 þeirra og eru þeir á aldrinum 26 til 74 ára. Þeir hafa verið ákærðir fyrir nauðgun.

Meðal mannanna sem hafa verið ákærðir eru fjölskyldumenn, giftir og einhleypir menn sem starfað hafa á ýmsum sviðum. Einn var hermaður, annar var blaðamaður og enn einn var smiður. Þá var einn fangavörður, annar hjúkrunarfræðingur og einn slökkviliðsmaður. Margir eiga börn.

Flestir þeirra nauðguðu konunni einu sinni en nokkrir gerðu það oftar. Einn mannanna er þó sagður hafa nauðgað henni sex sinnum. Engir peningar gengu mannanna á milli.

Einhverjir þeirra hafa haldið því fram að þeir hefðu talið að þeir væru að taka þátt í kynlífsathöfnum hjónanna og að konan hefði veitt leyfi. Pelicot segir þó að hann hafi sagt þeim öllum að hann hefði byrlað henni í óþökk hennar.

Flestir mannanna standa frammi fyrir allt að tuttugu ára fangelsisvist, verði þeir sakfelldir. Pelicot er þeirra á meðal.