Naumt hjá Skyttunum

Arsenal vann 1-0 heimasigur á Shakhtar Donetsk í 3. umferð Meistaradeildar Evrópu. Eina mark leiksins var sjálfsmark Dmytro Riznyk, markvarðar gestanna, á 29. mínútu.

Skytturnar hans Mikel Arteta voru vissulega betri aðilinn í kvöld en mörkin létu standa á sér. Sigurmarkið kom eftir tæpan hálftíma þegar Riznyk varði boltann í eigið net. Leandro Trossard fékk kjörið tækifæri til að tvöfalda forystuna þegar skammt var til leiksloka en Riznyk varði vítaspyrnu hans.

Lokatölur 1-0 og Arsenal hefur því ekki enn fengið á sig mark í Meistaradeild Evrópu, markatalan 3-0 eftir þrjá leiki og sjö stig komin í hús. Arsenal situr sem stendur í 4. sæti en Shakhtar er í 29. sæti.