Bowen tryggði West Ham sigur á United

Jarrod Bowen tryggði West Ham United sigur á Manchester United með marki úr vítaspyrnu í uppbótartíma í ensku úrvalsdeildinni í dag. Lokatölur á Lundúnaleikvanginum 2-1, Hömrunum í vil.

United fékk urmul færa í fyrri hálfleiknum en það besta féll Diogo Dalot í skaut. Hann skaut yfir fyrir opnu marki á 32. mínútu. Þá fór boltinn tvisvar sinnum í slána á marki West Ham.

Julen Lopetegui, knattspyrnustjóri West Ham, gerði þrefalda skiptingu í hálfleik og hans menn spiluðu betur eftir hlé.

Einn af varamönnunum, Crysencio Summerville, kom West Ham yfir á 74. mínútu en Casemiro jafnaði sjö mínútum síðar.

Undir lok leiks braut Matthijs de Ligt svo á Danny Ings innan vítateigs og David Coote, dómari leiksins dæmdi víti eftir að hafa skoðað atvikið á myndbandi.

Bowen tók spyrnuna, skoraði framhjá André Onana og tryggði Hömrunum góðan sigur.

Með sigrinum jafnaði West Ham United að stigum. Bæði lið eru með ellefu stig eftir níu leiki.