Þrjár húsleitir framkvæmdar í tengslum við Landsbankann

Embætti sérstaks saksóknara hefur framkvæmt þrjár húsleitir í dag sem eru tengdar rannsókn á málefnum gamla Landsbankans.

Yfirheyrslur yfir sjö einstaklingum hófust í morgun og standa enn yfir.

Ólafur Þór Hauksson sérstakur saksóknari varðist allra frétta og gat ekki gefið upp hverjir þessir sjö einstaklingar væru.

Þegar haft var samband við Kristján Kristjánsson, upplýsingafulltrúa Landsbankans, kannaðist hann ekki við að húsleitir hefðu farið fram í bankanum.