50 Cent fæðir Afríku

Rapparinn og viðskiptajöfurinn 50 Cent hefur þróað nýjan orkudrykk, sem kemur á markað innan skamms. Orkudrykkurinn heitir Street King og hagnaðinum af sölu hans verður varið í að fæða afrísk börn.

50 Cent ferðaðist nýlega um Afríku og segir uppátækið innblásið af hungursneyðinni sem ríkir víða í heimsálfunni. „Ég ólst upp í fátækt, en ég var ekki svangur,“ segir 50 Cent í myndbandi sem hann sendi frá sér um málið.

Fyrst um sinn verða tvær bragðtegundir í boði, blanda af appelsínu og mangó og svo greip.