Lík tveggja barna fundust í frysti í Detroit

Lögregla í Detroit í Bandaríkjunum hefur handtekið konu eftir að lík tveggja barna hennar fundust í frystikistu á heimili þeirra. Líkin fundust við útburð á heimilinu, að því er CNN greinir frá.

Konan er enn í haldi lögreglu en hún hefur ekki verið nafngreind. Lögregla segir strák og stúlku hafa verið í frystinum, strákurinn um það bil ellefu ára og stúlkan um það bil fjórtán. Tvö eldri systkini þeirra bjuggu einnig á heimilinu en þeim hefur verið komið í umsjá yfirvalda.

Bæði líkin voru geymd í plastpoka. Lögregla segir að enn sé of snemmt til að segja til um hvað gerðist en óskar eftir því að allir sem búi yfir upplýsingum um glæpinn stígi fram.