Það styttir hins vegar alltaf upp og var gleðin allsráðandi þegar íslenska karlalandsliðið í knattspyrnu hélt út til Frakklands til þess að taka þátt í Evrópumótinu í fótbolta. EM-ævintýrinu eins og það er nú jafnan kallað, enda var árangur þeirra ævintýri líkastur.
Hér fyrir neðan má sjá samantekt yfir þær innlendu fréttir sem vöktu hvað mesta athygli lesenda Vísis á árinu, en listinn er langt frá því að vera tæmandi.
Atburðarásin í kringum Wintris
Ótrúleg atburðarás fór af stað eftir þátt Kastljóss hinn 3. apríl um Panama-skjölin þar sem nafn Sigmundar Davíðs Gunnlaugssonar þáverandi forsætisráðherra kom fyrir, en hann var skráður fyrir aflandsfélaginu Wintris. Þátturinn leiddi til stærstu mótmæla Íslandssögunnar sem fóru fram á Austurvelli en tugþúsundir Íslendinga komu saman og kröfðust afsagnar Sigmundar.
Tveimur dögum eftir þáttinn, hinn 5. apríl, sagði Sigmundur Davíð af sér embætti. Sigurður Ingi Jóhannsson, varaformaður Framsóknarflokksins, tók í kjölfarið við embættinu, en Höskuldur Þórhallsson, þingmaður Framsóknarflokksins, tilkynnti fyrir mistök að Sigurður Ingi yrði forsætisráðherra, líkt og sjá má á myndbandinu hér fyrir neðan.
Panama-lekinn er umfangsmesti gagnaleki síðari tíma. Nöfn fjölmargra Íslendinga er að finna í ugögnunum en auk Sigmundar Davíðs voru það þau Bjarni Benediktsson fjármálaráðherra og Ólöf Nordal innanríkisráðherra.

Kosningar voru nokkuð fyrirferðarmiklar því bæði var gengið til Alþingis- og forsetakosninga.
Forsetakosningar fóru fram í júlímánuði en aldrei hafa eins margir verið í framboði og nú. Ólafur Ragnar Grímsson, sem ætlaði að bjóða sig fram til embættisins, hætti við framboð og í kjölfarið bauð Davíð Oddsson sig fram. Búist var við að Davíð yrði helsti keppinautur Guðna Th. Jóhannessonar sagnfræðings, samkvæmt fyrstu skoðanakönnunum, en þegar upp var staðið var það Halla Tómasdóttir sem komst næst Guðna í atkvæðafjölda. Guðni var settur í embættið 1. ágúst, en þá hafði Ólafur Ragnar Grímsson verið forseti Íslands í 20 ár.
Alþingiskosningar voru næstar á dagskrá en landsmenn gengu fyrr til kosninga en áætlað var vegna Wintris-málsins. Mikil gremja ríkti í þjóðfélaginu; landsmenn mótmæltu og skoruðu á stjórnvöld að boða til kosninga þar sem ríkisstjórnin væri rúin trausti. Hinn 29. október gengu Íslendingar að kjörborðinu eftir stutta kosningabaráttu. Sjálfstæðisflokkur hlaut flest atkvæði, eða 29 prósent, og Vinstri græn voru næst stærst með 15,9 prósent. Þó hefur enn ekki tekist að mynda ríkisstjórn.

Óþarft er að rekja EM-ævintýrið svonefnda ítarlega enda er það eflaust ferskt í minni flestra Íslendinga. Íslenska karlalandsliðið í knattspyrnu skráði sig á spjöld sögunnar á mótinu og fylgist nánast hvert einasta mannsbarn með liðinu.
Það sem varpaði eilitlum skugga á gleðina var að hundruð Íslendinga voru sviknir um miða á leiki Íslands í Frakklandi. Eftirspurn eftir flugmiðum til Frakklands var gríðarleg og sáu margir sér leik á borði og skipulögðu flugferðir út, en stóðu þó ekki endilega við sitt. Björn Steinbekk athafnamaður var á meðal þeirra sem skipulagði ferð út og hefur hann nú verið kærður til lögreglu fyrir fjársvik.

Ferðamenn voru áberandi í umræðunni í ár, enda hafa ferðamenn hér á landi aldrei verið fleiri. Bandaríkjamaðurinn Noel Santillian er líklega sá ferðamaður sem vakti hvað mesta athygli en hann endaði óvart á Siglufirði en átti pantað hótelherbergi í Reykjavík. Ástæðan var eitt lítið „r“ en Noel átti pantað hótelherbergi á Hótel Frón við Laugaveg, en GPS-tækið hans beindi honum á LaugaRveg.
Önnur frétt sem vakti mikla athygli, og er ein mest lesna frétt ársins á Vísi, er frétt með fyrirsögninni: Fannst þau eins og á valdi fjárkúgara í langþráðri brúðkaupsferð á Íslandi. Þar segjast hjónin Sarah og Mark Bellew vonsvikin yfir heimsókn þeirra til landsins vegna verðlagsins.
Leit að rjúpnaskyttum
Björgunarsveitir landsins höfðu sem fyrr í nógu að snúast. Meðal viðamestu verkefna björgunarsveitanna var annars vegar þegar tveggja manna var saknað á Snæfellsnesi í nóvember svo og þegar leitað var að Friðriki Rúnari Garðarssyni, en mennirnir þrír áttu það allir sameiginlegt að hafa verið á rjúpnaskytteríi. Þeir fundust allir heilir og höldnu. Fjölmiðlar fylgdust með þegar Friðrik Þór hitti loks fjölskyldu sína, en stundin var afar hjartnæm, líkt og sjá má hér fyrir neðan.
Fréttir um Hótel Adam við Skólavörðustíg vöktu mikla athygli í byrjun árs. Myndum og tilkynningum hafði verið komið upp inni á hótelinu þar sem varað var við kranavatninu, en þess í stað var gestum bent á að drekka vatn af flöskum, sem seldar voru á 400 krónur. Málið vatt upp á sig og fyrr en varði tók heilbrigðiseftirlitið hótelið út og lögregla hóf rannsókn á meintu vinnumansali á hótelinu.
Vísir leit við á Hótel Adam, líkt og sjá má hér fyrir neðan.

Þúsundir kvenna komu saman á Austurvelli á kvennafrídaginn 24.október eftir að hafa lagt niður störf klukkan 14.38 þann dag. Baráttufundir voru einnig haldnir á Akureyri, Grundarfirði, Hellu, Höfn í Hornafirði, Neskaupstað og Þorlákshöfn.