D-riðill á HM í Katar: Greið leið fyrir Mbappé og Eriksen

Vísir telur niður í heimsmeistaramótið í Katar sem hefst 20. nóvember næstkomandi. Í síðustu viku og næstu daga tökum við fyrir einn riðil í keppninni á hverjum degi og að þessu sinni er það D-riðillinn sem fær á sig sviðsljósið.

Frakkar eru ríkjandi heimsmeistarar og Danir búnir að sýna hvað í þá er spunnið með því að komast í undanúrslit á EM í fyrra og afar sannfærandi undankeppni.

Á sama tíma hafa lið Túnis og Ástralíu aldrei gert neinar rósir á HM og öfugt við hin tvö liðin þá skriðu þessar þjóðir með miklum naumindum inn á mótið í Katar.

Auk þess að hafa komist í undanúrslit á EM í fyrra, þrátt fyrir hjartastopp Christians Eriksen, sýndu Danir mikla yfirburði í sínum riðli í undankeppni HM. Þeir héldu þar marki sínu hreinu í fyrstu átta leikjunum og ljóst að það verður ekkert grín fyrir önnur lið að finna leiðina framhjá Kasper Schmeichel.

Schmeichel er með fyrir framan sig afar sterka varnarlínu og miðjan hjá Dönum, með Eriksen og Pierre-Emile Höjbjerg innanborðs, er í sannkölluðum heimsklassa, en það er spurning hvort að það komi liðinu í koll að vera ekki með betri framherja.

Danir og Frakkar munu eflaust komast upp úr D-riðlinum og að sama skapi berjast um að forðast að mæta Argentínu í 16-liða úrslitunum, enda líklega betri tilhugsun að mæta til dæmis Póllandi. Leikurinn á milli Dana og Frakka er í annarri umferð riðlakeppninnar, 26. nóvember.

Frakkar hafa orðið fyrir miklum skakkaföllum en ef einhver þjóð ræður við það að missa út leikmenn þá eru það Frakkar. Þeir eru enn með tvo af allra, allra bestu sóknarmönnum heims í Kylian Mbappé og Karim Benzema, og frábæran markvörð í Hugo Lloris, en að ýmsu leyti hefur kvarnast úr liðinu sem varð heimsmeistari í Rússlandi fyrir fjórum árum.

Frakkar vonast eftir því að verða fyrstir til að vinna HM tvisvar í röð síðan að Brasilíu tókst það á HM 1958 og 1962.

Stórt skarð er fyrir skildi hjá liðinu því N‘Golo Kanté, sennilega mikilvægasti leikmaður Frakka um árabil, missir af HM vegna meiðsla. Hið sama er að segja um félaga hans á miðjunni í Rússlandi, Paul Pogba, og miðvörðinn Presnel Kimpembe. Miðvörðurinn Raphael Varane er í hópnum þrátt fyrir meiðsli og Antonie Griezmann verður líklega í byrjunarliðinu þrátt fyrir að hafa verið mikið í hlutverki varamanns hjá Atlético Madrid.

En Frakkar hafa einfaldlega slíkt úrval leikmanna að inn geta til að mynda komið ungir og frábærir miðjumenn úr Real Madrid og miðvörður sem slegið hefur í gegn með efsta liði ensku úrvalsdeildarinnar.

Danir eru með gríðarlega öflugt og hungrað lið, og ef Kasper Dolberg eða Martin Braithwaite tekst að reima á sig markaskóna, og jafnvel ef það tekst ekki, er verðlaunasæti ekki óraunhæft markmið fyrir frændur vora.

Túnis reiðir sig alfarið á varnarleikinn og hefur tekist býsna vel upp því liðið hefur haldið markinu hreinu í yfir helmingi síðustu 50 leikja sinna. Liðið þarf svo að reyna að koma boltanum fram á reynda og fljóta sóknarmenn sína, Youssef Msakni og Wahbi Khazri, en fyrir fram er ekki hægt að búast við miklu frá þeim.

Túnisbúar hafa nefnilega aldrei komist upp úr riðlinum á HM og þrátt fyrir að hafa verið heppnir með drátt í umspilinu í Afríku rétt svo náðu þeir að merja Malí í tveggja leikja umspili, samtals 1-0 með hræðilegu sjálfsmarki Moussa Sissako.

Ástralía skreið líka áfram inn á HM með því að vinna Perú í vítaspyrnukeppni í umspili á milli liða úr Asíu- og Suður-Ameríkukeppninni.

Gullkynslóð Ástrala er farin en í liðinu eru reynslumiklir og ágætir leikmenn líkt og fyrirliðinn og markvörðurinn Mat Ryan, sem varði mark Brighton en er núna með Íslendingunum í FC Kaupmannahöfn, og miðjumennirnir Aaron Mooy og Ajdin Hrustic.

Ástralía og Túnis þurfa að vonast eftir afar óvæntum úrslitum gegn Frakklandi eða Danmörku en ætla sér eflaust bæði sigur í innbyrðis leik sínum 26. nóvember.

Þjálfarar liðanna í D-riðlinum:

Frakkland - Hinn 54 ára gamli Didier Deschamps hefur stýrt Frökkum frá árinu 2012 og unnið silfur á EM 2016 og svo gull á HM 2018. Hann var fyrirliði liðsins sem vann HM 1998 og EM 2000.

Danmörk – Hinn fimmtugi Kasper Hjulmand tók við danska landsliðinu af Åge Hareide sumarið 2020 og stýrði því til undanúrslita á EM í fyrra þar sem liðið tapaði í framlengingu gegn Englandi.

Túnis – Jalel Kadri heldur upp á 51 árs afmæli sitt í desember. Hann tók við Túnis á Afríkumótinu í janúar eftir að hafa verið aðstoðarþjálfari liðsins og áður stýrt fjölda félagsliða í Túnis, Sádi-Arabíu og víðar.

Ástralía – Hinn 59 ára gamli Graham Arnold er fyrrverandi landsliðsmaður Ástralíu og hefur lengi verið viðloðandi landsliðið sem aðstoðarþjálfari, bráðabirgðaþjálfari og þjálfari U23-landsliðsins. Hann tók við sem aðalþjálfari A-landsliðsins af Hollendingnum Bert van Marwijk í mars 2018.

Stærstu stjörnurnar:

Kylian Mbappé (Frakklandi) – 23 ára sóknarmaður PSG sem sló eftirminnilega í gegn á HM fyrir fjórum árum þegar Frakkar urðu heimsmeistarar og þykir einn albesti leikmaður heims.

Karim Benzema (Frakklandi) – 34 ára sóknarmaður Real Madrid sem hlaut Gullknöttinn í ár eftir að hafa leitt Madrídinga til sigurs í Meistaradeild Evrópu og spænsku deildinni.

Christian Eriksen (Danmörku) – 30 ára miðjumaður Manchester United sem gengið hefur í endurnýjun lífdaga, bókstaflega, eftir að hafa hnigið niður í beinni útsendingu á EM í fyrrasumar.

Pierre-Emile Höjbjerg (Danmörku) – 27 ára miðjumaður Tottenham sem verndar vörnina með krafti sínum og staðsetningu en getur einnig, eins og reyndar allir í danska liðinu, lúðrað boltanum almennilega á markið. Ef Eriksen er gangráðurinn þá er Höjbjerg hjartað í danska liðinu.

Youssef Msakni (Túnis) – 32 ára kantmaður og liðsfélagi Arons Einars Gunnarssonar hjá Al-Arabi sem verður því á heimavelli í Katar, eftir að hafa misst af HM í Rússlandi vegna meiðsla.

Wahbi Khazri (Túnis) - 31 árs kantmaður Montpellier í Frakklandi og næstmarkahæsti leikmaður í sögu Túnis.

Ajdin Hrustic (Ástralíu) – 26 ára, sóknarsinnaður miðjumaður Hellas Verona sem hjálpaði Frankfurt að vinna Evrópudeildina á síðustu leiktíð.

Aaron Moy (Ástralíu) – 32 ára miðjumaður Celtic í Skotlandi sem sneri aftur til Evrópu í sumar eftir að hafa verið kominn til Shanghai Port í Kína.

Fylgist með þessum:

Aurélien Tchouaméni (Frakklandi) – 22 ára miðjumaður sem Real Madrid pungaði út rúmum 12 milljörðum króna fyrir í sumar og hefur fest sig þar í sessi, fyrir framan landa sinn Eduardo Camavinga í goggunarröðinni. Sennilega spila þeir saman á HM.

Mikkel Damsgaard (Danmörku) – 22 ára kantmaður Brentford sem hefur átt erfitt uppdráttar á fyrstu leiktíð sinni í ensku úrvalsdeildinni, eftir meiðslatímabil síðasta vetur, en kom af miklum krafti inn í danska byrjunarliðið á EM í fyrra eftir að Eriksen lauk keppni.

Hannibal Mejbri (Túnis) – 19 ára, afar hárprúður, miðjumaður í eigu Manchester United sem í vetur leikur sem lánsmaður hjá Birmingham. Lék fyrir yngri landslið Frakklands en á foreldra frá Túnis og gæti fengið tækifæri til að láta ljós sitt skína í Katar.