Á nefndarfundi í dag þar sem hún var að tala um árlega skýrslu leyniþjónusta Bandaríkjanna um þær ógnir sem steðja að ríkinu, sagði Haines að Rússa skorti bæði skotfæri og hermenn til að ná umfangsmiklum landvinningum. Hún sagði Vladimír Pútín, forseta Rússlands, átta sig á vandamálum rússneska hersins og að hann gæti tekið stefnubreytingu.
Undanfarnar vikur hafa Rússar lagt mikið púður í árásir víða í austurhluta Úkraínu og reynt að brjóta leiðir í gegnum varnir Úkraínumanna. Það hefur skilað takmörkuðum árangri og eru Rússar sagðir hafa orðið fyrir gífurlegu mannfalli. Þrátt fyrir það hafa þeir haldið árásunum áfram.
„Pútín skilur líklega betur takmarkanir hers síns og virðist ætla að draga úr markmiðum sínum, í bili,“ sagði Haines á fundinum, samkvæmt frétt New York Times.
Þá sagði hún rússneska herinn þurfa fleiri hermenn og skotfæri annarsstaðar frá. Án þess gætu Rússar ekki haldið árásum sínum áfram á komandi mánuðum. Þá verði þeir að grípa til varna. Hún sagði Pútín líklegan til að vilja draga stríðið á langinn því hann sæi það sem bestu leiðina til að ná markmiðum sínum.
„Í stuttu máli sagt þá sjáum við ekki að rússneski herinn geti jafnað sig nóg á þessu ári til að hertaka stór svæði,“ sagði Haines.
Fyrir áramót sögðu ráðamenn í Úkraínu að Pútín stefni á aðra umfangsmikla herkvaðningu til að fylla upp í raðir sínar. Ekkert varð þó af þeirri herkvaðningu, þó enn sé reglulega verið að kveðja rússneska menn í herinn.
Sjá einnig: Rússar sagðir stefna á aðra herkvaðningu
Sérfræðingar bandarísku hugveitunnar Institute for the study of war slógu á svipaða strengi og Haines í gær. Í nýjustu stöðuskýrslu hugveitunnar segir að jafnvel þó Rússar nái fullum tökum á bæinn Bakhmut í Dónetskhéraði, sem þeir hafa reynt að ná frá því í sumar, sé ólíklegt að herinn geti sótt lengra fram, eins og Vólódímír Selenskí, forseti Úkraínu, sagði í gær að hann óttaðist.
Hugveitan segir rússneska herinn ekki í stöðu til að sækja frekar fram vegna skorts á hermönnum, hergögnum og þeim bryn- og skriðdrekum sem þarf til að sækja fram um langar vegalengdir. Þar að auki hafi Úkraínumenn þegar undirbúið varnir vestur af Bakhmut.
Það eina sem Rússar hafi burði til að gera að svo stöddu sé að sækja fram í smáum sveitum sem geri þeim eingöngu kleift að ná smávægilegum sigrum.
ISW assesses that #Russian forces would be unable to convert the capture of #Bakhmut into significant gains in #Donetsk b/c they 1) would likely have used up their remaining combat power 2) would need to choose between 2 diverging lines of advance 3) lack mechanized forces. https://t.co/tUK1m2OX3s pic.twitter.com/Un3VlQKrtf
— ISW (@TheStudyofWar) March 8, 2023
Þurfa 250 þúsund sprengikúlur á mánuði
Úkraínumenn skortir einnig skotfæri fyrir stórskotalið. Ráðamenn í Evrópusambandinu vinna að því að auka framleiðslu skotfæra til muna en samkvæmt frétt New York Times hefur einnig verið lagt til að stofna sérstakan sjóð til að kaupa allt að milljón sprengikúlur fyrir Úkraínumenn.
Blaðamenn Financial Times komu nýverið höndunum yfir bréf frá varnarmálaráðherra Úkraínu, til varnarmálaráðherra ríkja Evrópusambandsins, þar sem hann sagði Úkraínumenn þurfa 250 þúsund sprengikúlur á mánuði. Nú væru þeir að skjóta um 120 þúsund kúlum á mánuði.
Heimildarmaður NYT segir þó að evrópsk fyrirtæki sem framleiði skotfæri sem þessi geti í mesta lagi framleitt um 650 þúsund kúlur á mánuði og á það við kúlur fyrir stórskotaliðsvopn og skriðdreka, sem skortir víða í Evrópu um þessar mundir.
Sérfræðingar búast við því að Úkraínumenn ætli sér gagnárásir gegn Rússum þegar vorið nálgast og að þeir muni meðal annars notast við nýjar hersveitir sem notast munu við vestræna bryn- og skriðdreka.
