Jarð­gerðar­vélin sem minnkar úr­gang og ein­faldar heimilis­lífið

Flokkun heimilissorpsins er auðvitað sjálfssagt mál en getur verið áskorun. Heimili mitt má varla við frekara flækjustigi og í hreinskilni sagt er ekki slegist um að fara út með ruslið, sem er vandamál þegar lífrænu afgangarnir safnast upp með tilheyrandi lykt og mögulega óboðnum gestum. Þegar einhver nefndi „töfratæki“ sem minnkaði magn úrgangs sperrti ég eyrun.

Reencle jarðgerðarvélin er sögð brjóta niður umfang lífræna úrgangsins sem fellur til á heimilinu margfalt. Kjöt og fiskur, grænmeti, brauðmeti, ostar, ávextir og fleira lífrænt verður að næringarríkum jarðvegsbæti á aðeins örfáum klukkutímum og ferðunum út með ruslið fækkar svo um munar. Afurðinni má henda í pappírspoka í lífræna hólfið í sorptunnunni eða nota hana í blómabeðin og á pottaplönturnar. Ekki skemmir fyrir að vélin er stílhrein og flott rafmagnsgræja með hreyfiskynjurum og tekur ekki mikið pláss. Það sem meira er, ferlinu á ekki að fylgja nein lykt.

Lífrænt niðurbrot án allra aukaefna

Reencle jarðgerðarvélin byggir á örverumassa sem þarf að vekja til lífsins svo niðurbrotið verði sem best. Ofan í tunnunni eru spaðar sem snúast rólega og velta massanum. Ferlið er algjörlega lífrænt og engin aukaefni þarf út í vélina. Það getur tekið nokkrar vikur fyrir örverurnar að ná fullri virkni en með því að fylgja leiðbeiningum um fyrstu skref er hægt að setja lífræna afganga í vélina strax á fyrstu dögunum.

Fyrsta skrefið til að koma vélinni af stað er að tæma pokann með örverunum sem fylgir, í vélina, ásamt 1.5 lítrum af vatni, setja vélina í samband og láta hana malla í sólarhring. Næstu tvo til þrjá daga er mælt með að mata vélina á einföldum kolvetnum eins og brauði en kolvetnin koma örverunum af stað en að því loknu má segja að jarðgerðin sé hafin í eldhúsinu heima.

Frú Moðgerður flutt inn

Fyrstu dagana leið mér og við hefðum fengið gest með viðkvæma meltingu inn á heimilið. Við vorum farin að kalla hana frú Moðgerði okkar á milli og brytjuðum ofan í hana brauðskorpur af fínustu sort. Fyrsta alvöru máltíð Moðgerðar á þriðja degi samanstóð af kaffikorgi og grænmetisafskurði og daginn eftir var það orðið að „engu“. Restin af morgunmatnum fór því óhikað í vélina og svo matarafgangarnir um kvöldið og þannig gekk þetta næstu daga.

Moðgerður hefur fínustu matarlyst og fer létt með um eitt kíló á dag. Umfangið minnkar um allt að 90% á 24 tímum.Hún vill þó ekki sjá bein, harðar skeljar eða harða kjarna. Eins er gott að brytja niður stærri stykki til að jarðgerðin gangi hraðar. Mjólk, jógúrt, súrmjólk og aðrar blautar mjólkurvörur fara illa í hana. Það blotnar of mikið í massanum og þá getur komið lykt.

Moðgerður þægileg í sambúð og ruslaferðum fækkar

Frú Moðgerður reyndist hreint ekki með eins viðkvæma meltingu og ég hélt í fyrstu. Ef það kemur fyrir að það blotni um of í massanum er hægt að ýta á „dry“. Þá eykst hitastigið í vélinni og jafnvægi kemst aftur á. Ferlið er lyktarlaust en mögulega getur komið lykt ef blautar mjólkurvörur fara í vélina eða skemmd matvæli sem þegar eru farin lykta. Þá er hægt að ýta á „purify“ sem eykur loftstreymi gegnum kolasíuna. Vélin er alveg hljóðlát en ef það þornar um of í massanum getur heyrst í henni en þá er nóg að bæta smá vatni til að fá raka í massann.

Á þessari viku sem Moðgerður hefur gúffað í sig afgöngum heimilisins hefur ekki enn þurft að fara út með lífræna ruslið Lengra komnir í heimilisjarðgerð segja okkur að þess þurfi jafnvel ekki nema tvisvar í mánuð eftir að vélin er komin í fulla virkni! Við erum líka orðin mun meðvitaðri um það sem endar í ruslinu hjá okkur og gætum betur að matarsóun. Jarðvegsbætinn sem Moðgerður framleiðir sjáum við fyrir okkur að safna í pott úti á palli og nota til að koma upp matjurtagarði í vor en áður en það er gert er mikilvægt að hafa í huga að um mjög næringaríka afurð er að ræða sem mikilvægt er að blanda við moldina í ákveðnum hlutföllum áður en hún er notuð.

Reencle jarðgerðarvélin verður í Hörpunni um helgina

Reencle jarðgerðarvélin er ný vara hjá Umbúðagerðinni og hluti af grænum lausnum fyrirtækisins með sjálfbærni og hringrásarhagkerfið að leiðarljósi. Umbúðagerðin framleiðir umbúðir úr bylgjupappa auk þess að selja jarðgerðarvélar fyrir bæði heimili og fyrirtæki en stærri vélarnar geta tekið frá 20 til 100 kíló af lífrænum úrgangi á dag.

Umbúðagerðin tekur þátt í Jólamatarmarkaði Íslands í Hörpunni um helgina og þar verður hægt að kynna sér Reencle jarðgerðarvélina en þessa dagana er sérstakur kynningarafsláttur af vélinni sem rennur út sunnudaginn 17. desember. Markaðurinn hefst á morgun klukkan 11 og stendur til klukkan 17, og einnig á sunnudag.