Jón Arnór hvíldur í sigri CAI Zaragoza

Jón Arnór Stefánsson var ekki með CAI Zaragoza þegar liðið vann níu stiga sigur á Baloncesto Fuenlabrada, 77-68, í spænsku úrvalsdeildinni í körfubolta í kvöld.

Jón Arnór var á skýrslu en kom ekkert inná í leiknum sem CAI Zaragoza vann nokkuð örugglega.

Belginn Jonathan Tabu var stigahæstur hjá Zaragoza með 16 stig, Pedro Llompart var með 14 stig og Bandaríkjamaðurinn Michael Roll skoraði 13 stig.

CAI Zaragoza vann fyrsta leikhlutann 21-16 og var með ellefu stiga forskot í hálfleik, 43-32.

CAI Zaragoza hefur ekki gengið alltof vel að undanförnu (einn sigur í fjórum leikjum) og sigurinn í kvöld var því dýrmætur fyrir Jón Arnór og félaga.