LaVar Ball búinn að koma tveimur yngstu sonunum til Litháens

Kjaftaskurinn LaVar Ball er búinn að koma tveimur yngri sonum sínum, LiAngelo og LaMelo, í atvinnumennsku. Ball-bræðurnir sömdu báðir til eins árs við litháíska félagið Prienu Vyautas.

LiAngelo, sem er 19 ára, hætti í UCLA-háskólanum á dögunum eftir að hafa verið settur í bann vegna atviks sem kom upp í æfingaferð í Kína. LiAngelo og tveimur liðsfélögum hans var stungið í steininn fyrir þjófnað.

Donald Trump Bandaríkjaforseti eignaði sér heiðurinn af því að hafa fengið LiAngelo og félaga hans lausa úr fangelsinu. LaVar Ball var á öðru máli og tókst að gera Trump brjálaðan eins og honum einum er lagið.

LaMelo, sem er aðeins 16 ára og þykir betri leikmaður en LiAngelo, hætti í menntaskóla í haust. Pabba hans leist ekki á skólastjórann og nýjan þjálfara körfuboltaliðsins og ákvað því að þjálfa strákinn sjálfur.

Prienu Vyautas situr á botni litháísku deildarinnar og á í miklum fjárhagsvandræðum. Ekki er búist við því að Ball-bræðurnir geri miklar rósir hjá liðinu.

Eldri bróðir LiAngelos og LaMelos, Lonzo Ball, spilar með Los Angeles Lakers í NBA-deildinni.