Ótrúleg endurkoma Harðar og félaga

Hörður Björgvin Magnússon lék allan leikinn í vinstri bakverðinum hjá Bristol City sem vann magnaðan 2-3 sigur á Hull City.

Heimamenn í Hull höfðu undirtökin framan af og leiddu 2-0 þegar hálftími lifði leiks. Hörður Björgvin og félagar gáfust hins vegar ekki upp, komu til baka með því að skora þrjú mörk á síðustu tuttugu mínútum leiksins og tryggðu sér þar með stigin þrjú.

Jón Daði Böðvarsson spilaði síðasta korterið í markalausu jafntefli Reading gegn Sheffield Wednesday.

Birkir Bjarnason var ekki í leikmannahópi Aston Villa sem vann öruggan 2-0 heimasigur á Ipswich Town.